დროა, მაყურებლის გონებაში კიდევ ერთხელ აფეთქდეს მილიონი კითხვა და... ყველაფერი დასრულდეს!

ნეტფლიქსმა რამდნიმე საათის წინ თავისი გახმაურებული გერმანული სერიალის Dark ფინალური სეზონის ტრეილერი გამოაქვეყნა და ამავდროულად პრემიერის თარიღიც დააანონსა: 27 ივნისი.

ერთგულ მაყურებლებს ემახსოვრებათ, რომ სერიალის სიუჟეტის მიხედვით სწორედ ესაა აპოკალიფსის დღე და შოუს შემქმნელებმაც სიმბოლურად ეს თარიღი შეარჩიეს Dark-ის ბოლო სეზონის გამოსასვლელად.

ტრეილერში მაყურებლებისთვის კარგად ნაცნობ პერსონაჟებს, მათ შორის ჯონასს და მართას ვხედავთ. "აქ რატომ ვარ?" — კითხულობს ჯონასი, რომელიც, როგორც ჩანს, მაყურებელზე არანაკლებ დაბნეულია შექმნილი სიტუაციით.

"ჩვენ ყველა იმ კითხვაზე გავცემთ პასუხს, რომლებიც მაყურებლებს ამ დროის განმავლობაში დაუგროვდათ და დროში არეული ამბების დალაგებაში დავეხმარებით. რთული იქნება საყვარელ პერსონაჟებთან დამშვიდობება, მაგრამ დასაწყისი დასასრულია, დასასრული კი — დასაწყისი", — განაცხადეს გასულ წელს შოუს შემქმნელებმა ფინალურ სეზონზე საუბრისას.

ცოტა ხნის წინ გავრცელებულ ტრეილერში შემდეგი დევიზი ჩნდება: "ფინალური ციკლი იწყება", შემდეგ კი "ფინალური ციკლი მთავრდება".

როგორც ჩანს, მაყურებლებს წინ კიდევ უფრო დაძაბული და საინტერესო სანახაობა ელით.