იუსტიციის მინისტრისა და ვიცე-პრემიერის, თეა წულუკიანის განცხადებით, ამერიკის სენატის საგარეო ურთიერთობათა კომიტეტის თავმჯდომარის, სენატორის რიშის განცხადება პოლიტპატიმრებზე იყო შინაარსობრივი შეცდომა. სენატორმა რიშმა გიგი უგულავასა და ირაკლი ოქრუაშვილს პოლიტპატიმრები უწოდა.

"ჩვენ გვინახავს ბევრჯერ, რომ დასავლელი ჩვენი მეგობრები აკეთებენ ასეთ შეფასებას. ჩემი აზრით, არც სამართლებრივად, არც განაჩენის მიხედვით, არც ქართულ საზოგადოებაში, ქვეყანაში არავინ სვამს კითხვას ვინ არიან ესენი. ამ ქვეყანაში და საზოგადოებაში, რომლის ნაწილიც ვარ მე, მიუხედავად ჩემი დღევანდელი სტატუსისა, ჩვენ ყველანი ვართ ერთსულოვანი — ესენი არიან დამნაშავეები.

მე ვფიქრობ, რომ ეს არის შეფასებითი შეცდომა", — განაცხადა მან რუსთავი 2-ის ეთერში.