მთავარ არხზე ახალი ქართული კომედიური სერიალი დიდი ოჯახი იწყება. სერიალი ტელეკომპანიის ეთერში ყოველ პარასკევსა და შაბათს, საღამოს 11 საათზე დაიწყება. მასში ვიხილავთ ყველასთვის ცნობილ მსახიობებს — თათული ედიშერაშვილს, თამუნა ნიკოლაძეს, ანი იმნაძეს, გოგა ბარბაქაძესა და ბაჩო ქაჯაიას.

დიდი ოჯახი ტრადიციული სიტკომის წესებით იქნება გადაღებული, რაც იმას ნიშნავს, რომ სერიალის ყურების პარალელურად მაყურებლის გულწრფელ ემოციებსა და სიცილს მოისმენთ.

შოუს პროდიუსერი ვანო ჯავახიშვილია. მისი თქმით, დიდი ოჯახი ყველა ასაკის მაყურებელზეა გათვლილი:

"ყველა სეგმენტს მოიცავს და ყველანაირი თემა იქნება შიგნით გაშლილი, ოღონდ იუმორისტულ ფორმატში".

სერიალის პრემიერის თარიღი ჯერჯერობით უცნობია. თუ რაზე იქნება დიდი ოჯახი და ვინ იქნებიან სერიალის მთავარი გმირები — ამაზე ტელეკომპანია მთავარის დილის გადაცემის წამყვანის და კინოჟურნალისტის ბექა მაისურაძის რეპორტაჟიდან გაიგებთ, რომელიც გადასაღებ მოედანზე შეიპარა და სერიალის მსახიობებისგან საინტერესო ინფორმაციის მოპოვებაც შეძლო.