პრეზიდენტ სალომე ზურაბიშვილის აზრით, დასავლელი პოლიტიკოსების მხრიდან ტერმინ პოლიტპატიმრის გამოყენება ნიშნავს, რომ ისინი ცუდად ინფორმირებულები არიან. ზურაბიშვილის თქმით, ეს ყველას პასუხისმგებლობაა და საჭიროა, მეტად იყვნენ ჩართული მათ ინფორმირებაში.

რუსთავი 2-ის ეთერში, წამყვანის კითხვაზე, ნიშნავს, თუ არა ეს, რომ ქვეყნის დიპლომატები ვერ მუშაობენ, ზურაბიშვილი პასუხობს:

"შეიძლება, ზოგ შემთხვევაში, ეს ნიშნავს, რომ ჩვენი დიპლომატები საკმარისად არ მუშაობენ. [...] გამოცდილმა დიპლომატმა იცის, რომ დიპლომატიურად ყველაფრის გაკეთება არ შეიძლება, როცა შენ ხარ რომელიმე საელჩოს ელჩი ან თანამშრომელი და ხარ მიმართული ყველა მიმართულებით და ყვეალფერს ვერ ფარავ".

ამ განცხადებამდე ზურაბიშვილი ტვიტერზე გამოეხმაურა პოლონელ ევროპარლამენტარ, ანა ფოტიგას განცხადებას, "საქართველოში პოლიტიკური პატიმრების შეწყალებაზე". ზურაბიშვილმა ევროდეპუტატს მოუწოდა, მხედველობაში მიიღოს ის, რომ მას "პოლიტპატიმრები" არ შეუწყალებია.

რუსთავი 2-ის ეთერში ზურაბიშვილმა აღნიშნა, რომ ეს იყო პირველი, მაგრამ არა უკანასკნელი პასუხი და როგორც ტვიტერის, ასევე, პირადი კონტაქტების საშუალებით, ყველას უპასუხებს.

ფოტიგას გარდა, არაერთმა ევროპარლამენტარმა და სენატორმა უწოდა პოლიტპატიმარი, როგორც გიგი უგუალვასა და ირაკლი ოქრუაშვილს, ასევე, გიორგი რურუას.

სალომე ზურაბიშვილმა ოპოზიციის ლიდერები, გიგი უგულავა და ირაკლი ოქრუაშვილი 15 მაისს შეიწყალა. მან აღნიშნა, რომ ის არ იწყალებს პოლიტპატიმრებს, რადგან ისინი ქვეყანას არ ჰყავს და ეს შეწყალება ჩვეულებრივ ჰუმანურ პრინციპებს არ ეფუძნება. მისი განმარტებით, გადაწყვეტილება მიიღო, რადგან ქვეყანა პოლიტიკური კრიზისის წინაშე იდგა და პრეზიდენტი ვერ დაუშვებდა პოლიტიზაციასა და დაპირისპირებას.

პრეზიდენტის გადაწყვეტილება წინ გადადგმულ ნაბიჯად შეაფასეს საერთაშორისო პარტნიორებმა და ხელისუფლებას მოუწოდეს, რომ შეთანხმება სრულად შეასრულოს.

გაიგეთ მეტი: