ამერიკის საელჩომ ჯანდაცვის სამინისტროს PCR ტესტირების ორი აპარატი და 4 000 ტესტი გადასცა. ამის შესახებ ინფორმაცია საქართველოში ამერიკის საელჩომ და ჯანდაცვის სამინისტრომ გაავრცელეს.

საელჩოს განცხადებით, დამატებითი აპარატები გაზრდის ტესტების გამტარუნარიანობას, შესაბამისად შესაძლებელი იქნება უფრო მეტი ნიმუშის ერთდროულად გატესტვა. აშშ-ის თავდაცვის საფრთხის შემცირების სააგენტოსგან (DITRA) სამინისტრომ 20 000-მდე დოლარის ღირებულების ინდივიდუალური დაცვის საშუალებებიც მიიღო.

"ვირუსთან ბრძოლის კუთხით ჯერ მხოლოდ ნახევარი გზა გვაქვს გავლილი, ძალიან ბევრი დეტალი გამოჩნდება და გამოიკვეთება ეკონომიკის ხელახლა გახსნის გზაზე. ეს ტესტირების აპარატები, ასევე ის პირადი დაცვის საშულებები, რაც დიტრა-მ გადასცა ჯანდაცვისა და სხვა სამინისტროებს, ძალიან მნიშვნელოვანია აღნიშნული პროცესის სამართავად და განკუთვნილია ხალხის დაცვისათვის", — თქვა კელი დეგნანმა.

ელჩმა აღნიშნა, რომ საქართველომ ვირუსთან ბრძოლის პირველ ნაწილს თავი კარგად გაართვა, ახლა კი ქვეყანა ყველაფერს აკეთებს, რომ ეს ეტაპიც წარმატებით გადალახოს. ჯანდაცვის მინისტრმა, ეკატერინე ტიკარაძემ ამერიკის საელჩოს თანამშრომლობისთვის მადლობა გადაუხადა.