ჩეხი ევროპარლამენტარი მწვანეთა ალიანსიდან, მარკეტა გრეგოროვა საქართველოში შექმნილი ვითარების შესახებ საუბრობს და ამბობს, რომ პოლიტიკური პატიმრები შეთანხმების ნაწილი იყო და ამაზე თავადაც იყო ინფორმირებული. ამის შესახებ ევროპარლამენტარმა მედია-პროექტში Пограничная ZONA იგორ კუროპტევისთვის მიცემულ ინტერვიუში ისაუბრა.

"მე თვალს ვადევნებ პროცესებს და ვწუხვარ იმის გამო, როგორც ვითარდება. ორი თვის წინ, როცა შეთანხმება შედგა, ერთ კვირაში გვინდოდა რეზოლუციის წარდგენა საქართველოში არსებულ სიტუაციაზე. თუმცა, როგორც ყველამ ვიცით, კორონავირუსის გამო აღარ მოგვეცა სტასბურგში სესიის ჩატარების შესაძლებლობა, შესაბამისად, რეზოლუციაც ვერ მივიღეთ. ჯერ კიდევ იმედი მაქვს, რომ მოლაპარაკებები და შეთანხმება რეზოლუციის შიშით არ იყო ნაკარნახევი, არამედ, გულწრფელ შეთანხმებაზე დააფუძნდა ხელისუფლებას, ოპოზიციასა და ყველა პატივსაცემ მხარეს შორის.

თუმცა, ეს ასე არჩანს. [...] მე ვწუხვარ იმის გამო, როცა ამბობენ, რომ პოლიტიკური პატიმრები შეთანხმების ნაწილი არ ყოფილა, როდესაც ჩვენც კი ინფორმირებულები ვიყავით ამაზე".

ქართული ოცნების ლიდერმა, ირაკლი კობახიძემ 12 მაისს, იმედის ეთერში აღნიშნა, რომ ოპოზიცია საერთაშორისო პარტნიორებს არასწორ ინფორმაციას აწვდის. მისი აზრით, ნაციონალურ მოძრობას "ერთი ხაზი აქვს გაჭრილი" და ამიტომ კრიტიკა ერთი და იგივე ადამიანებისგან ისმის.

ბოლო დღეებში ოპოზიციასა და მთავრობას შორის მიღწეული საარჩევნო შეთანხმება ისევ განხილვის საგანი გახდა. ოპოზიციაში აცხადებენ, რომ შეთანხმებიდან ორი თვის შემდეგ მმართველი გუნდი პირობებს არ ასრულებს, რადგან პოლიტიკოსები ისევ პატიმრობაში არიან.

ამ თემასთან დაკავშირებით ოპოზიცია ლეიბორისტული პარტიის ოფისში დღეს, 13 მაისს კიდევ ერთხელ შეიკრიბა. პოლიტიკური ლიდერების განცხადებით, მათი პოზიცია ერთიანია და საარჩევნო კანონპროექტს მხარს არ დაუჭერენ, თუ 8 მარტის შეთანხმების ორივე პირობა არ შესრულდება.

ოპოზიციის საპასუხოდ, პარლამენტის თავმჯდომარე აცხადებს, რომ მმართველ გუნდს პატიმრების გათავისუფლების პირობა არავითარი ფორმით, არავის წინაშე არ დაუდია. თალაკვაძის მტკიცებით, ამას მკაფიოდ ადასტურებს ყველა ფაქტი და დოკუმენტი, მათ შორის თავად შეთანხმების ტექსტი. ქართული ოცნების წარმომადგენლები საუბრობენ იმაზეც, რომ ოპოზიციის მოთხოვნა სასამართლოსთვის დავალების მიცემას გულისხმობს, რასაც არ გააკეთებენ.

დისკუსიას გამოეხმაურნენ საელჩოებიც. მოლაპარაკებებში ჩართული დიპლომატების ერთობლივ განცხადებაში მითითებულია, რომ შეთანხმება შედგება ორი ნაწილისგან: ერთი ფოკუსირებულია საარჩევნო სისტემაზე, მეორე კი ყურადღებას ამახვილებს იმ საკითხების გადაჭრაზე, "რაც სასამართლო სისტემაში პოლიტიკურ ჩარევას ჰგავს". საელჩოებმა მოუწოდეს ყველა მხარეს, სრულად დაიცვან შეთანხმების ორივე ნაწილი, რათა ის წარმატებით განხორციელდეს.

8 მარტს, ხანგრძლივი განხილვების შემდეგ, ოპოზიციამ და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.