პარლამენტის პირველი ვიცე-სპიკერის, გიორგი ვოლსკის თქმით, საოცარია, რომ ფეისბუქის მიერ წაშლილ გვერდებთან დაკავშირებით ყურადღება კოკა ყანდიაშვილზე გადაიტანეს.

მისი თანაპარტიელის, მამუკა მდინარაძის მსგავსად, გია ვოლსკიც ამბობს, რომ ყანდიაშვილის მათი პარტიის მხარდამჭერია. მისი თქმით, მთავარი ისაა, რომ ფეისბუქის ანგარიშში ნაციონალურ მოძრაობასთან დაკავშირებულ გვერდებზეა საუბარი.

"აქედან ცდილობენ, გადაიტანო ყურადღება კოკა ყანდიაშვილზე, რომელმაც კიდევ არ ვიცით დაარღვია თუ არ დაარღვია, მაგრამ ვიცით, რომ ქართულ ოცნებას მხარს უჭერს, ფეისბუქი თავად იძლევა შესაძლებლობას შექმნა პლატფორმები, მოიზიდო ხალხი, შექმნა ჯგუფები, თუმცა შეიძლება, რომ დაარღვიო და გადასცდე რეგულაციებს. ტრაგედია ისაა, რომ პოლიტიკური პარტია, რომელიც მიიჩნევს კანდიდატად თავს ქვეყანა მართოს და რომელიც წლების განმავლოაბაში ქვეყანას მართავდა, ჩაეშვა, აი, ამ ფეისბუქის თუ სხვა მორალურ-ეთიკური და სამართლებრივი ნორმების დარღვევაში", — განაცხადა გია ვოლსკიმ.

დღეს, 6 მაისს ქართული ოცნების დეპუტატმა, მამუკა მდინარაძემ Facebook-ის ანგარიშს სპეციალური ბრიფინგი მიუძღვნა, თუმცა მხოლოდ ნაციონალურ მოძრაობასთან დაკავშირებული გვერდების წაშლაზე ისაუბრა. ჟურნალისტების კითხვის დასმამდე, მას არ უხსენებია კოკა ყანდიაშვილის ესპერსონასთან დაკავშირებული გვერდების წაშლა. ის ყანდიაშვილს გაემიჯნა, მიუხედავად იმისა, რომ წლების წინ მათი PR ტექნოლოგი იყო.

"რაც შეეხება კოკა ყანდიაშვილს, ამ საკითხთან დაკავშირებით, რომ დამთავრდეს ერთხელ და სამუდამოდ სპეკულირება; ჩვენ გვახსოვს ნარატივები, ბოტებისა და ტროლების ქარხანა და ა.შ, ამ ადამიანს ოფიციალურად შეხება 2013-14 წლიდან ქართულ ოცნებასთან აღარ აქვს. ყველამ იცის, რომ ის ქართული ოცნების მხარდამჭერია და ებრძვის ნაციონალურ მოძრაობას", — განაცხადა მან და დაამატა, რომ ამის შემდეგ ყანდიაშვილთან კავშირი არ ჰქონიათ და მას პარტიისგან არანაირი დავალება არ მიუღია.

5 მაისს გამოქვეყნდა Facebook-ის ანგარიში, რომელშიც განმარტებული იყო, რომ კომპანიამ ნაციონალურ მოძრაობასთან და კოკა ყანდიაშვილის მედია ესპერსონასთან დაკავშირებული ფეისბუქგვერდები წაშალა. ფეისბუქის განცხადებით, გაუქმდა 80 გვერდი, 23 პირადი ანგარიში, 41 ჯგუფი და 9 ინსტაგრამანგარიში, რომელიც გამოძიებამ ენმ-სთან ასოცირებულ ინდივიდებთან დააკავშირა.

"მოცემული ქმედებების უკან მდგომი ინდივიდები კონტენტზე კომენტარის გასაკეთებელად და ჯგუფებისა თუ გვერდების სამართავად იყენებდნენ ავთენტური და არაავთენტური ანგარიშების კომბინაციას. გვერდების ნაწილი კი მოქმედებდა როგორც დამოუკიდებელი მედიასაშუალება.

უმეტესწილად, მათ მიერ განთავსებული კონტენტი ეხებოდა ლოკალურ მიმდინარე მოვლენებსა და პოლიტიკურ თემებს, როგორებიცაა 2018 წლის არჩევნები, ქართული მართლმადიდებლური ეკლესია, მოქმედი ხელისუფლების პანდემიის მართვის ტაქტიკის კრიტიკა და სხვა. მოცემული გვერდების ნაწილს 2018 წლის შემდგომ არ უმოქმედია", — წერია კომპანიის განცხადებაში.