კომპანია თბილისი ენერჯის ინფორმაციით, დღეს, 22 აპრილს, დილით, გლდანში 62 წლის კაცი, სავარაუდოდ, CO-თი დაიღუპა. კომპანიაში აღნიშნავენ, რომ ბინაში წლის გამაცხელებელი კუსტარულად იყო დამონტაჟებული და სიკვდილის მიზეზიც, სავარაუდოდ, ის გახდა.

გარდა ამისა, ბინაში უგონო მდგომარეობაში იმყოფებოდა კიდევ ერთი ადამიანი, ახალგაზრდა კაცი, რომელიც საავადმყოფოშია გადაყვანილი.

"სამაშველო საგამოძიებო და თბილისი ენერჯის სწრაფი რეაგირების სამსახურის სპეციალისტების ადგილზე მისვლის შემდეგ, სპეციალური აპარატურით შემოწმდა გაზგაყვანილობა. ბინაში აღმოჩნდა აკრძალული, კუსტარულად დამონტაჟებული მკვლელი ღია კამერიანი წყლის გამაცხელებელი", — აღნიშნავენ თბილისი ენერჯიში.

მათივე ინფორმაციით, ამ ბინაში კომპანიის თანამშრომლებმა კუსტარულად დამონტაჟებული დანადგარი რამდენიმე თვის წინ აღმოაჩინეს და ქსელიდან ჩახსნეს, იქ მცხოვრები ადამიანები კი გააფრთხილეს. კომპანია შესაბამის დოკუმენტსაც ავრცელებს.

ფოტო: თბილისი ენერჯი

On.ge დაუკავშირდა საქართველოს შინაგან საქმეთა სამინისტროს. მასალა მათი პასუხის მიღებისთანავე განახლდება.

განახლება: შსს-ს ინფორმაციით, საქმეზე გამოძიება სისხლის სამართლის კოდექსის 240-ე პრიმა მუხლით დაიწყეს, რაც გულისმხობს ელექტრო-ან თბოენერგიის, გაზის, ნავთობის ან ნავთობპროდუქტების ობიექტზე უსაფრთხოების წესების დარღვევას, რასაც მოჰყვა ადამიანის სიცოცხლის მოსპობა ან სხვა მძიმე შედეგი.

თბილისი ენერჯი მოსახლეობას აფრთხილებს, დაიცვან გაზზე მომუშავე დანადგარების უსაფრთხო მოხმარების წესები და გაითვალისწინონ სპეციალისტების რჩევები.

"კიდევ ერთხელ შეგახსენებთ, რომ კატეგორიულად აკრძალულია დახურულ სივრცეში ღია კამერიანი გაზის გამათბობლების და წყლის გამაცხელებლების (ე.წ. კალონკების) მოხმარება. გაუფრთხილდით საკუთარი ოჯახის წევრების და მეზობლების ჯანმრთელობას", — ამბობენ ორგანიზაციაში.