"დღეს წითელი პარასკევია, დიდი მარხვის ყველაზე მძიმე დღე და უჩვეულოა, რომ ამ დღეს ქვეყნის პრეზიდენტმა საჭიროდ ჩათვალოს თავის ხალხს მიმართოს" — ამ სიტყვებით დაიწყო საუბარი საქართველოს პრეზიდენტმა, სალომე ზურაბიშვილმა მოსახლეობისადმი მიმართვაში. მან რელიგიური დღესასწაულების მოახლოებაზე ისაუბრა და მრევლს კანონის უზენაესობის დაცვა და სახლში დარჩენა ურჩია.

"მიმართვას საჭიროდ მივიჩნევ იმიტომ, რომ ახლა ჩვენი სახელმწიფოს ცხოვრებაში ერთ-ერთი მძიმე დრო დგება და ჩვენ ამ პერიოდის მხოლოდ დასაწყისში ვართ. ყველა მონაცემი, სხვა ქვეყნების გამოცდილება, ექიმების გაფრთხილება, ეპიდემიოლოგების შეფასება და მიმდინარე პროცესი გვიჩვენებს, რომ არ გვაქვს არც მოდუნების და არც თვითკმაყოფილების უფლება", — განაცხადა მან.

პრეზიდენტმა აღნიშნა, რომ ქვეყანა ერთად უნდა გაუმკლავდეს ამ გამოწვევას, თუ არ სურს გაიზიაროს წამყვანი ქვეყნების ტრაგიკული რეალობა. მანვე ხაზი გაუსვა იმ ფაქტს, რომ სხვა რელიგიურმა კონფესიებმა დაიცვეს კანონი თავის დიდ დღესასწაულებზე და მოუწოდა მართმადიდებლებს, რომ თავადაც იგივე გააკეთონ.

"თუ დაწვრილებით არ ვიცით და ვერ გავთვლით როდის იქნება ეს პიკი, ერთი რამ კარგად უნდა გვესმოდეს, რომ პიკი გარდაუვალია. ისევე, როგორც კარგად უნდა გვესმოდეს, რომ ეს პიკი ყველას შეიძლება შეეხოს", — განაცხადა მან.