დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

დაავადებათა კონტროლის ცენტრის სამეცნიერო ხელმძღვანელის, პაატა იმნაძის თქმით, კორონავირუსით ინფიცირებული მარნეულელი ქალის ოჯახის 4 წევრს ვირუსი დაუდასტურდა.

მისი თქმით, გარდა ოჯახის წევრებისა, აღნიშნული პაციენტის სხვა კონტაქტებიც გამოკვლეულია და ამ ეტაპზე გამოკვლეულ ადამიანებს ვირუსი არ დაუდასტურდათ.

"ძალიან მნიშვნელოვანია ის, რომ დღეს რა შემთხვევებიც იყო, არ არის ახალი კლასტერები. 4 ადამიანი არის მარნეულელი ქალბატონის ოჯახის წევრები. გამოკვლეული იქნა, ასევე, მარნეულში სხვა პაციენტები, რომლებიც იმ საავადმყოფოში იყვნენ, სადაც ეს ქალბატონი იწვა, მარნეულში ჯეოჰოსპიტალში და ასევე ჯეოჰოსპიტალის პერსონალი. ისინი, ყველა, ამ ეტაპზე ტესტირების შედეგად არაინ უარყოფითები", — განაცხადა პაატა იმნაძემ.

საქართველოს მთავრობის გადაწყვეტილებით, მაღალი ეპიდემიოლოგიური რისკის
გამო,23 მარტიდან მარნეულისა და ბოლნისის რაიონი მკაცრ საკარანტინო რეჟიმზე გადავიდა. საკარანტინო პირობები მარნეულის და ბოლნისის მუნიციპალიტეტებში, მათ შორის, მოქალაქეთა შესვლისა და გამოსვლის შეზღუდვას ითვალისწინებს. ქალაქში შემსვლელ და გამსვლელ საგანგებოდ მოწყობილ სპეციალურ გამშვებ პუნქტებზე კონტროლს პოლიცია და თავდაცვის ძალები ახორციელებენ.

ასევე, იზღუდება ყველა ობიექტი, საკვებისა და აფთიაქების გარდა. მთავრობამ დაუშვა გამონაკლისიც და იმ შემთხვევაში, როდესაც პროტოკოლით გაიწერება, მარნეულის მოსახლეობას სასოფლო-სამეურნეო სამუშაოების ჩატარება შეეძლება.