თვითიზოლაციის დროს, მარტოსულობის გასაფანტად, ინსტაგრამის მომხმარებლებმა ახალი გამოწვევა, ჰეშთეგით #StayAtHomeChallange (დარჩი სახლში) წამოიწყეს და მთელი ინტერნეტი დაიპყრეს. ატვირთულ ვიდეოებში, პასუხისმგებლობით აღჭურვილი მოქალაქეები, სხვებს სახლში მოფიქრებულ გასართობებს სთავაზობენ. ამ კამპანიას ახალი ჰეშთეგი, #10TouchesChallenge მოჰყვა, რაც ტუალეტის ქაღალდის 10-ჯერ აკენწვლას გულისხმობს.

გამოწვევას ცნობილი ქართველი ფეხბურთელი, გურამ კაშია შეუერთდა. ინსტაგრამზე დადებულ პოსტში ჩანს, რომ სპორტსმენი თვითიზოლაციაშიც ცდილობს ფორმის შენარჩუნებას. კაშია ფეხბურთს შვილთან ერთად, ტუალეტის ქაღალდით თამაშობს და ბოლოს ფანებს ეკითხება, წითელ ბარათს იმსახურებს თუ უფრო ყვითელს?

თვითიზოლაციისთვის დაწყებულ კამპანიას შეუერთდა ლეო მესიც. ვიდეო ბარსელონას ოფიციალურმა ტვიტერმა გამოაქვეყნა.

პოსტები ძალიან სახალისოა და სახლში დარჩენა ნამდვილად კარგი საქციელია. მაგრამ, გასათვალისწინებული გარემოების გამო, ტუალეტის ქაღალდის გაფლანგვასაც ვერ მოვუწონებთ.

სახლში დარჩენის იდეა ცნობილმა ვარსკვლავებმაც აიტაცეს. კრის მარტინმა, სპეციალურად იზოლაციაში მყოფი ფანებისთვის Coldplay-ის ინსტაგრამზე უფასო კონცერტი ჩაატარა.