თბილისის საქალაქო სასამართლომ კორუფციაში ბრალდებულ ბორჯომის საკრებულოს თავჯმდომარეს აღკვეთი ღონისძიების სახით ორთვიანპატიმრობა შეუფარდა. დაცვის მხარემ გირაოს შუამდგომლობა დააყენა, თუმცა მოსამართლემ შუამდგომლობა არ გაიზიარა.

რაც შეეხება ბორჯომის მერს, ლევან ლიპარტიასა და კიდევ ერთ დაკავებულ მოქალაქეს, მათი აღკვეთის ღონისძიებაზე სასამართლო სხდომა ჯერ კიდევ მიმდინარეობს.

ბორჯომის საკრებულოს თავმჯდომარე გიორგი გოგიჩაიშვილი და ბორჯომის მუნიციპალიტეტის მერი ლევან ლიპარტია ქრთამის აღების ბრალდებით დააკავეს.

გამოძიების ვერსიით, საკრებულოს თავმჯდომარემ განაშენიანების რეგულირების გეგმის საკრებულოს სხდომაზე გატანისა და მშენებლობის ნებართვის გაცემის სანაცვლოდ, მეწარმეს ქრთამის სახით მოსთხოვა 200 ათასი ლარი, საიდანაც წინასწარ გამოართვა 20 000 ლარი. უწყების ცნობით, აღნიშული პირი თანხის გადაცემისთანავე დააკავეს. სუს, ასევე, ირწმუნება, რომ ბორჯომის მერმა დაბა ბაკურიანში უკანონო მშენებლობების მფარველობის სანაცვლოდ, ამავე მეწარმეს 10 500 ლარი მოსთხოვა, საიდანაც ეტაპობრივად 8 ათასი ლარი გამოართვა.

სუს-ის მტკიცებით, დანაშაულის შესახებ ცნობილი იყო ბორჯომის მერის მეგობრისთვი, მოქალაქე გ.უ-სთვის, რომელმაც ამის შესახებ სამართალდამცავ ორგანოებს არ შეატყობინა.

გამოძიება დიდი ოდენობით და განსაკუთრებით დიდი ოდენობით ქრთამის აღებისა და განსაკუთრებით მძიმე დანაშაულის შეუტყობინებლობის ფაქტზე მიმდინარეობს (საქართველოს სსკ-ის 338-ე მუხლის მე-2 ნაწილის "ბ" და "ე" ქვეპუნქტებით, რაც სასჯელის სახით 7-დან 11 წლამდე ვადით თავისუფლების აღკვეთას ითვალისწინებს, 338-ე მუხლის მე-3 ნაწილის "ე" ქვეპუნქტით, რაც სასჯელის სახით 11-დან 15 წლამდე ვადით თავისუფლების აღკვეთას ითვალისწინებს და 376-ე მუხლის მე-3 ნაწილით, რაც სასჯელის სახით 3-დან 7 წლამდე თავისუფლების აღკვეთას ითვალისწინებს).