პაკისტანში რამდენიმე დღის წინ დაკავებული ავღანელი ქალი შარბათ გულა, რომელიც მოელვარე მწვანე თვალებით National Geographic-ის ყდაზე 1985 წელს გამოჩნდა, შესაძლოა მომავალ კვირას გაათავისუფლონ.

ინფორმაციას პაკისტანში წარდგენილ ავღანეთის ელჩზე დაყრდნობით Hindustan Times ავრცელებს.

ელჩი ომარ ზახილვალი ფეისბუკზე წერს, რომ ავღანელი ერი გულას დაპატიმრებამ შეაძრწუნა, რადგან ის ავღანეთის ყველაზე ცნობილ და საყვარელ სურათზეა გამოსახული:

"მისმა გათავისუფლებამ შესაძლოა პაკისტანელი და ავღანელი ხალხი კიდევ უფრო დააახლოვოს".

ელჩი აცხადებს, რომ საიდენტიფიკაციო ბარათი, რომელიც მას პაკისტანის სამართალდამცავებმა ჩამოართვეს, ყალბი არ ყოფილა:

"მე პაკისტანის მთავრობის ოფიციალურ წარმომადგენელს სარტაჯ აზიზს მივმართე განეხილა იმ ბრალდებების არაკანონიერება, რომლებსაც შარბათ გულას უყენებენ და მან მე გარანტიები მომცა".

შარბათ გულა დაკავების შემდეგ.

ფოტო: AFP

ელჩის თქმით, შარბათ გულას გათავისუფლების შემთხვევაში, ის თავის ქვეყანაში ოჯახთან ერთად დაბრუნდება და მასზე ავღანეთის მთავრობა იზრუნებს.

შარბათ გულა ახლა 40 წლისაა. მას შარბათ ბიბის სახელითაც იცნობენ. ის გაყალბებული საბუთების და პაკისტანში არალეგალურად ცხოვრების გამო რამდენიმე დღის წინ დააპატიმრეს.

ბრალის დამტკიცების შემთხვევაში, გულას დეპორტი ან ციხეში 14 წლის გატარება ემუქრება.

ფოტოს ისტორია

შარბათ გულა 12 წლის იყო, როდესაც ფოტოგრაფმა სტივ მაქქურიმ მისი ცნობილი ფოტო გადაიღო. იმ პერიოდში გულა პაკისტანში არსებულ ავღანელების ლტოლვილთა ბანაკში ცხოვრობდა.

ფოტო: Steve McCury