თბილისის მერმა კახა კალაძემ 18 დეკემბრის მთავრობის სხდომა 15 წლის გარდაცვლილი მოზარდის, ლუკა სირაძის სამძიმრით დაიწყო. კალაძის თქმით, ბავშვის დაღუპვაში პასუხისმგებელი მთლიანად საზოგადეობაა:

"ოჯახი, სკოლა და, ასევე, სახელმწიფო, ერთნაირადაა პასუხისმგებელი მომავალ თაობაზე".

კალაძე აღნიშნავს, რომ მოზარდებს სიძულვილისა და აგრესიის ირგვლივ უწევთ ცხოვრება:

"ყველამ გავიხსენოთ, როგორები ვიყავით 15 წლის ასაკში. ყველას გამოვლილი გვაქვს ეს ასაკი და, ალბათ, შეგვიძლია გავიხსენოთ, თუ რამხელა ენერგია და ემოციები დუღდა თითოეულ ჩვენთაგანში, რამდენად რთულად გვეჩვენებოდა ცხოვრება, თითოეული მოვლენა, რომელიც ჩვენს ირგვლივ იყო. ლუკაც ასეთი ბიჭი იყო გარდატეხის ასაკში, რომელიც რატომღაც დაეჯახა გაუცხოებას, გულგრილობას არაპროფესიონალიზმს. ძალიან მძიმეა ეს ყველაფერი, გუშინ მთელი ღამე ვფიქრობდი და რატომ, რისი გულისთვის?" — ამბობს კალაძე.

15 წლის ბიჭი, რომელიც დაკითხვის შემდეგ კორპუსიდან გადმოხტა, გუშინ, 17 დეკემბერს გარდაიცვალა.

გუშინ მოზარდის გარდაცვალების შემდეგ აქციები გაიმართა იაშვილის კლინიკასთანაც, სადაც მოქალაქეებმა თეთრი მიხაკები და სანთლები მიიტანეს. პარალელურად კი აქტივისტებმა შინაგან საქმეთა სამინისტროსთან და მწვანე სკოლასთან წარწერები — "ამ ცხოვრების დედაც!" დატოვეს.

მოზარდის გარდაცვალების საქმეზე გუშინ გამომძიებელი დააკავეს. სახელმწიფო ინსპექტორის, ლონდა თოლორაიას განმარტებით, დიდუბე-ჩუღურეთის სამმართველოს პოლიციის პირველი განყოფილების გამომძიებელი მარიანა ჩოლოიანი სისხლის სამართლის კოდექსის 335-ე მუხლის ბრალდებით დააკავეს, რაც ჩვენების მიცემის იძულებას გულისხმობს.

ახალგაზრდა იურისტთა ასოციაციის განცხადებით, არასრულწლოვანმა თვითმკვლელობა, სავარაუდოდ, საგამოძიებო ორგანოს თანამშრომლების მხრიდან ფსიქოლოგიური ძალადობის გამო სცადა.

შემთხვევა 2019 წლის 11 დეკემბერს მოხდა. მანამდე მოზარდი გვიან ღამით თავისი ყოფილი სკოლის შენობაში შევიდა შიდა და გარე ტერიტორიაზე წარწერები დატოვა. ამასთან დაკავშირებით სკოლამ პოლიციაში დარეკა და გამოძიება დაიწყო.