იუსტიციის საბჭოს არამოსამართლე წევრის, ნაზი ჯანეზაშვილის თქმით, ის პარლამენტში არ შეუშვეს. ამის შესახებ ის ფეისბუქზე წერს. როგორც ჯანეზაშვილი ამბობს, პარლამენტში შესასვლელი საშვი მისთვის გუშინ დაუშვეს.

"უჩემოდ აირჩევენ ე.წ. კვალიფიციურ და კლანის მხარდამჭერ მოსამართლეებს", — წერს ჯანეზაშვილი.

იურიდიულ საკითხთა კომიტეტზე დღეს უზენაესი სასამართლოს მოსამართლეობის 19 კანდიდატს კენჭს უყრიან. კანდიდატებს დეპუტატები ხმას ღია კენჭისყრაზე მისცემენ. ამის შემდეგ კანდიდატებს კენჭი პლენარულ სხდომაზე უნდა უყარონ.

კოალიცია დამოუკიდებელი და გამჭვირვალე მართლმსაჯულებისთვის უმრავლესობას მიმართავს, რათა მოსამართლეების კანდიდატურების შესათანხმებლად ოპოზიციასთან მოლაპარაკებები აწარმოოს და კანდიდატები დამოუკიდებლად საკასაციო სასამართლოში არ განაწესოს. ორგანიზაცია აღნიშნავს, რომ კანდიდატთა ნაწილი ხშირ შემთხვევაში ელემენტარულ სამართლებრივ შეკითხვებსაც კი ვერ პასუხობდა.

კენჭისყრის პარალელურად პარლამენტთან დილიდან იმართება აქციაც. ოპოზიცია და სამოქალაქო აქტივისტები უმრავლესობას მოუწოდებენ, მხარი არ დაუჭირონ მოსამართლეთა სიას.