პრეზიდენტ ემანუელ მაკრონის შეთავაზებული ახალი საპენსიო რეფორმის წინააღმდეგ საფრანგეთში ფართომასშტაბიანი გაფიცვა დაიწყო. ბოლო წლებში ეს შეიძლება ყველაზე დიდი გაფიცვა იყოს.

გაფიცვაში მონაწილეობენ მასწავლებლები, საზოგადოებრივი ტრანსპორტის მძღოლები, პოლიციელები, სასამართლოების თანამშრომლები, მედიკოსები, ავიადისპეტჩერები და სხვადასხვა სფეროს წარმომადგენლები. ბევრ სკოლაში შეჩერებულია სწავლა, შეფერხებულია ტრანსპორტის მოძრაობა, ხოლო საავადმყოფოებში პერსონალის მცირე ნაწილი მუშაობს.

საფრანგეთის ისტორიაში ერთ-ერთი ყველაზე დიდი გაფიცვა პროფკავშირებმა დააორგანიზეს. ისინი ამბობენ, რომ ერთდღიანი გაფიცვით არ შემოიფარგლებიან. შინაგან საქმეთა მინისტრმა, კრისტოფ კასტანერმა განაცხადა, რომ ქვეყნის მასშტაბით 250 დმეონსტრაცია იგეგმება.

რკინიგზის კომპანია SNCF-ში ამბობს, რომ გაფიცვების გამო მატარებლების მხოლოდ 10 პროცენტი იმუშავებს, ზოგიერთი რეგიონული მარშრუტი კი არ შესრულდება. გაფიცვა შეეხება საერთაშორისო სარკინიგზო ხაზსაც. პარიზის მეტროს 16 ხაზიდან კი მხოლოდ ხუთი მუშაობს.

როგორია მაკრონის საპენსიო რეფორმა

საფრანგეთში ათობით სხვადასხვა საპენსიო პროგრამა მოქმედებს. მაკრონი ამტკიცებს, რომ ეს პროგრამები ძალიან რთული და ძვირადღირებულია, სწორედ ამიტომ მას ერთიანი წესების შემოღება სურს.

პრეზიდენტის გეგმა ქულათა სისტემის შემოღებას ითვალისწინებს, რომელიც ყველა სამუშაო დღეს დაითვლის. სამომავლო პენსია კი დაგროვილი ქულების მიხედვით განისაზღვრება. ახალი სისტემის შემთხვევაში ბევრი სფეროს წარმომადგენელი, მაგალითად მეზღვაური, იურისტი და საოპერო არტისტები, გარკვეულ პრივილეგიებს კარგავს.

საპენსიო ასაკი ბოლო ათ წელში 60-დან 62 წლამდე გაიზარდა. განვითარებულ ქვეყნებს შორის ეს ერთ-ერთი ყველაზე დაბალი მაჩვენებელია. მაკრონის რეფორმა კი საპენსიო საპენსიო ასაკის გაზრდასაც გამოიწვევს, რადგან 62 წლის ასაკში პენსიაზე გასვლა მომგებიანი არ იქნება. სრული პენსიის მიღებისთვის ფრანგებს პენსიაზე გასვლა 64 წლის ასაკში მოუწევთ.

გამოკითხვებს მიხედვით, მოსახლეობის 75 პროცენტი საპენსიო სისტემის რეფორმას ეთანხმება, თუმცა მხოლოდ მესამედს სჯერა, რომ ხელისუფლება ადეკვატური რეფორმის გატარებას შეძლებს.