ქართული მარშის, ლევან ვასაძის, გურამ ფალავანდიშვილის და სხვა ჰომოფობიური ჯგუფების მსგავსად ფილმი And Then We Danced საპატრიარქოსთვისაც მიუღებელია. მათი აზრით, ფილმის პრემიერა არის "დიდი შეტევა ეკლესიასა და ეროვნულ ფასეულობებზე".

საპატრიარქოში ამბობენ, რომ გარკვეულ ძალას ძალიან აწუხებს ეკლესიის ავტორიტეტი, მოსახლეობის სიყვარული ღვთისა და ტრადიციული ღირებებულებისადმი და მის შესარყევად სხვადასხვა მეთოდს მიმართავს. მათივე თქმით, ეს ყველაფერი ხალხის ცნობიერების შესაცვლელად და იდენტობის დასაკარგად ხდება.

გარდა ამისა, საპატრიარქოში ჰგონიათ, რომ ფილმ And Then We Danced-ის ჩვენება სინოდის სხდომის შემდეგ სპეციალურად დაიგეგმა. მათ მიერ გავრცელებულ განცხადებაში წერია, რომ "შემთხვევითი არ არის" ფილმის ჩვენება სხდომის შემდეგ განვითარებული მოვლენების ფონზე.

თუმცა, ინფორმაცია იმის შესახებ, რომ ფილმის პრემიერა ნოემბერში გაიმართებოდა სინოდის სხდომამდე 4 დღით ადრე, 27 ოქტომბერს გავრცელდა. ფილმზე ბილეთების გაყიდვა კი 30 ოქტომბერს, სინოდის სხდომის წინა დღეს დაიწყო.

ქართული მარში, ვასაძე და სხვები ჩვენების "მშვიდობიანი ფორმით ჩაშლას" ან "პოლიციის გაწევას" და "დარბაზის დაკავებას, პიკეტირებას" აანონსებენ. საპატრიარქო კი აცხადებს, რომ ძალადობას და ძალადობრივ ქმედებებს ემიჯნება. შინაგან საქმეთა სამინისტროს განცხადებით, ჩვენებაზე დაიცავენ გამოხატვის თავისუფლებას და მოქალაქეების უსაფრთხოებას.

ამავე თემაზე: