"მინდა, მხარდაჭერა გამოვუცხადო პატრიარქს, რომელიც მდაბიო სიძულვილის ენის სამიზნე გახდა", — ასე ეხმაურება სახალხო დამცველი, ნინო ლომჯარია გუშინ, 31 ოქტომბერს საპატრიარქოში განვითარებულ მოვლენებს.

ლომჯარიას შეფასებით, საპატრიარქოში მიმდინარე დაპირისპირება "მხოლოდ ძალაუფლებისთვის ბრძოლაა და არაფერი აქვს საერთო სუფთა და ამაღლებულ მიზნებსა თუ იდეალებთან".

"მაგრამ ერთი რამ ჩემთვის ცალსახაა, ყველა, ვინც ბრძოლის იარაღად იყენებს ბრალდებას სექსუალური ორიენტაციის ან სექსუალური ცხოვრების შესახებ, არის ფსკერი და ასევე დიაგნოზი მისი მორალური სახის. მინდა, ჩემი, როგორც ადამიანის, მოქალაქის, სახალხო დამცველის მხარდაჭერა გამოვუცხადო პატრიარქს, რომელიც ამ მდაბიო სიძულვილის ენის სამიზნე გახდა, რომელიც ასევე ადამიანია, ხანდაზმული ადამიანი და ადამიანის წინააღმდეგ ბრძოლისას არასოდეს უნდა გადაკვეთო ზღვარი, რაც პატრიარქის მიმართ ძალიან ბინძური ხერხებით იქნა გადაკვეთილი", — წერს ლომჯარია Facebook-ზე.

გუშინ, 31 ოქტომბერს მეუფე პეტრემ საპატრიარქოს დატოვების შემდეგ თქვა, რომ ილია მეორე პიდარასტიის, მამათმავლობის ცოდვითაა შეპყრობილი". მისივე თქმით, მამათმავლობის მხილების გამო პატრიარქმა ის მღვდელმთავრობიდან გადააყენა.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.