შინაგან საქმეთა სამინისტროს ინფორმაციით, ხაშურში ყოფილი ცოლის მკვლელობაში ბრალდებული პირი დააკავეს. უწყების განცხადებით, გამოძიებით დადგინდა, რომ მან ცეცხლსასროლი იარაღის კონდახით თავის არეში სასიკვდილო დაზიანებები მიაყენა ქალს და შემთხვევის ადგილიდან მიიმალა.

პოლიციამ, დაკავებულის პირადი ჩხრეკისას, 2 ხელყუმბარა და სანადირო დანა ნივთმტკიცების სახით ამოიღო. მათივე თქმით, ხელყუმბარა და ცეცხლსასროლი იარაღი ნივთმტკიცებად ამოღებულია შემთხვევის ადგილიდანაც.

გამოძიება ოჯახის წევრის მიმართ დამამძიმებელ გარემოებაში ჩადენილ განზრახ მკვლელობის, ასევე, ცეცხლსასროლი იარაღის, საბრძოლო მასალისა და ასაფეთქებელი მოწყობილობების უკანონო შეძენა-შენახვა-ტარების საქმეებზე, საქართველოს სისხლის სამართლის კოდექსის 11 პრიმა 109-ე მუხლის მე-2 ნაწილის "ვ" ქვეპუნქტით, 236-ე მუხლის მე-3 და მე-4 ნაწილებით მიმდინარეობს. ამ მუხლების მიხედვით ჩადენილი დანაშაული 13-დან 17 წლამდე ვადით თავისუფლების აღკვეთას ითვალისწინებს.