ადვოკატი ალექსანდრე კობაიძე ამბობს, რომ რუსთავის პოლიციის სამმართველოში 24 საათზე მეტია მის დაცვის ქვეშ მყოფთან არ უშვებენ. მისივე თქმით, ამ ხნის განმავლობაში ის ახლობლებსაც არ უნახავთ.

კობაიძის დაცვის ქვეშ მყოფი რუსთავში გარდაცვლილი კაცის საქმეზე გამოკითხვაზე დაიბარეს. კაცი პირველ ოქტომბერს გაუჩინარდა და ხუთი დღის შემდეგ მისი ცხედარი რუსთავში მტკვარმა გამორიყა. გამოძიების ინფორმაციით, გარდაცვლილი ბოლოს კობაიძის კლიენტს ესაუბრა.

როგორც ადვოკატი მთავართან ამბობს, მათი ვარაუდით, მისი კლიენტი ამ დრომდე სამმართველოშია. მისივე თქმით, გარდა იმისა, რომ ოჯახის წევრებმა არ იციან თუ რა მდგომარეობაშია ის, ასევე, სახალხო დამცველს არ მისცეს მისი ადგილსამყოფელის დადგენის საშუალება. ალექსანდრე კობაიძე ფიქრობს, რომ მისი დაცვის ქვეშ მყოფზე ზეწოლა ხორციელდება.

ამასთან დაკავშირებით On.ge შინაგან საქმეთა სამინისტროს დაუკავშირდა. უწყებაში განაცხადეს, რომ ამ ეტაპზე საგამოძიებო მოქმედებები მიმდინარეობს და დამატებით ინფორმაციას ვერ გაავრცელებენ.