სახალხო დამცველი მსოფლიო ფსიქიკური ჯანმრთელობის საერთაშორისო დღეს განცხადებას ავრცელებს და წერს, რომ საქართველოში მენტალური შეზღუდვის მქონე პირთა უფლებრივი მდგომარეობა სათანადოდ დაცული არ არის:

"საკითხის გააქტიურება მნიშვნელოვანია ფსიქიკური ჯანმრთელობის პრობლემების მქონე პირთა მიმართ არსებული სტიგმის, იზოლაციისა და დისკრიმინაციის დაძლევისთვის, რაც კვლავ დაბრკოლებაა ამ ადამიანებისა და მათი ოჯახებისთვის.

მიუხედავად იმისა, რომ სახელმწიფოს მიერ მიღებულია ფსიქიკური ჯანმრთელობის განვითარების სტრატეგიული დოკუმენტი და 2015–2020 წლის სამოქმედო გეგმა, შენელებულია მისი იმპლემენტაციის პროცესი. შედეგად არ ხდება გეგმით დასახული მიზნებისა და მთავარი ფასეულობების დაცვა".

სახალხო დამცველი წერს, რომ მონიტორინგის დროს გამოიკვეთა ქვეყანაში ამ კუთხით არსებული პრობლემები. მათ შორის:

  • ფსიქიკური ჯანმრთელობის არასაკმარისი დაფინანსება;
  • ადამიანური რესურსების მკვეთრი ნაკლებობა;
  • კვალიფიციური კადრების სიმცირე;
  • დაწესებულებების ინფრასტუქტურის გაუმართავობა;
  • სტაციონარულ ფსიქიატრიულ მკურნალობაზე მყოფი პირების მხრიდან ინფორმირებული თანხმობის მიღების ფორმალური ხასიათი;
  • არანებაყოფლობითი სტაციონარული ფსიქიატრიული დახმარების პრაქტიკასთან დაკავშირებული პრობლემები;
  • სათემო სერვისებისა და ალტერნატიული მომსახურების ნაკლებობა/არ არსებობა.

სახალხო დამცველი კიდევ ერთხელ მოუწოდებს სახელმწიფოს პოზიტიური ქმედებების განხორციელებისკენ, რათა ფსიქიკური ჯანმრთელობის პრობლემის მქონე ადამიანები და მათი ოჯახები დაცული იქნან სტიგმის, იზოლაციისა და დისკრიმინაციისგან.