საქართველოს ყოფილი პრეზიდენტის, მიხეილ სააკაშვილის გუშინდელი განცხადებების გამო ნინო ლაპიაშვილმა ნაციონალური მოძრაობის პოლიტსაბჭო და პარტია დატოვა. ამის შესახებ ის Facebook-ზე წერს.

ლაპიაშვილი აღნიშნავს, რომ გიგა ბოკერიას მისამართით სააკაშვილის გაკეთებულ განცხადებებს ემიჯნება. მისივე თქმით, ბოკერიას წარმოჩენა, როგორც ქართული ტრადიციების წინააღმდეგი, არასწორია და დიდი პოლიტიკური შეცდომაა.

"ანუ, რა გამოდის?! 2000-იანი წლების დასაწყისში დავბრუნდეთ და ვიძახოთ "ბოკერია იეღოველი" , რადგან ბოკერია რელიგიური უმცირესობების ჩაგვრას და მათზე ძალადობას მკაფიოდ და არაორაზროვნად აპროტესტებდა, თუ როგორ არის ჩვენი საქმე?! ბოკერიას კრიტიკა სხვა ნიადაგზე არგუმენტირებულად შეიძლება, თუ მაინც და მაინც ეს საკითხი პრიორიტეტულად ხვდება ლიდერი ოპოზიციური პარტიის ხელმძღვანელის/დამფუძნებლის დღის წესრიგში", — აღნიშნავს ის.

მისივე თქმით, ის დარწმუნებულია, რომ 2020 წლის არჩევნებს ოპოზიცია მოგიებს და ნაციონალური მოძრაობა წამყვანი ძალა იქნება. თუმცა, მისი თქმით, "თუ გუშინ გაჟღერებული იდეოლოგიით უნდა მოხდეს ქვეყნის მართვა, მაშინ უარესი შედეგებით და მმართველი ძალისთვის უფრო მწვავედ დასრულდება, ვიდრე ეს 2012-ში მოხდა".

"წლების განმავლობაში ყველანაირი შეურაცხყოფა ავისხლიტე ჩემი მიშა სააკაშვილის მხარდაჭერისა და მოგვიანებით, ენმ-ს პოლიტსაბჭოს წევრობის გამო, მაგრამ იდეის მჯეროდა და საერთოდ არ მანაღვლებდა. ახლა, ამ სიტუაციაში სად არის იდეა, რომელიც გამაძლიერებს?! ხოლო, თუ მთავარი ღირებულებები გაქრა და აშკარად მიუღებელთან ზღვარი წაიშალა, მაშინ აწმყოში რაღა მაერთიანებს ამ უდაოდ დიდ პოლიტიკოსთან, რომელმაც უახლოეს წარსულში ნამდვილად საფუძველი ჩაუყარა თანამედროვე ქართულ სახელმწიფოებრიობას?! სამწუხაროა, მაგრამ უნდა დავტოვო პარტია და პოლიტსაბჭო", — წერს ლაპიაშვილი.

მიხეილ სააკაშვილმა გიგა ბოკერია გუშინ, 29 სექტემბერს გადაცემა მთავარ აქცენტებში გააკრიტიკა.

"ბოკერიას ჰქონდა მთელი ეს წლები განსაკუთრებულად ცინიკური დამოკიდებულება ქართული ტრადიციებისა და ფასეულობების მიმართ. ჩვენი ფასეულობები, რომელიც ჩვენთვის არის უძვირფასესი... ბოკერია არის ყველაფერი, პრინციპში, რაც არის ქართული ტრადიციების წინააღმდეგ", — თქვა სააკაშვილმა.

ამავე თემაზე: