საქართველოს პარლამენტის წევრი უმრავლესობიდან, სოფო კილაძე ამბობს, რომ პრეზიდენტობის დროს გიორგი მარგველაშვილმა მკვლელები შეიწყალა. მან TV პირველის ჟურნალისტის თხოვნის მიუხედავად, ვერ დაასახელა მკვლელობისთვის გასამართლებული კონკრეტული პირების სახელები და გვარები.

"სახელებსა და გვარებს, თუ გინდათ, მოგცემთ... აი, მაგალითად, იაგო ნებიერიძე, რომელიც გამოვიდა, მართალია, მკვლელობისთვის არ იყო, მაგრამ იმიტომ ვამბობ, რომ ეს იყო ძალიან გახმაურებული საქმე. ის გამოვიდა და ჩვენ ვნახეთ პატარა გოგონა მსხვერპლი [მოკლული]. არ იყო [მკვლელობისთვის] ბრალდებული, მაგრამ შედეგი ხო დადგა... თუ გინდათ მოგიტანთ შემდეგ გადაცემაში... მოდით, გადავიდეთ სხვა თემაზე..." — თქვა სოფო კილაძემ.

პატიმრების შეწყალება

პრეზიდენტის მიერ შეწყალების სისტემის გამჭვირვალობასთან დაკავშირებით ბოლო რამდენიმე კვირაში არაერთი კითხვა დაისვა. 17 სექტემბერს ცნობილი გახდა, რომ სალომე ზურაბიშვილმა მარიამობას მკვლელობაში მსჯავრდებული კიდევ ერთი პირი, ზურაბ ნადირაძე შეიწყალა. მის ექსტრადიციას საქართველოს მთავრობა 23 წლის განმავლობაში ითხოვდა.

მანამდე ინფორმაცია გავრცელდა, რომ ზურაბიშვილმა 18 წლის დათო ოთხმეზურის მკვლელობისთვის გასამართლებული ასლან ბეჟანიძე შეიწყალა. ბეჟანიძე 2016 წლის მარტში დააკავეს და 11 წელი ჰქონდა მისჯილი.

ამასთანავე, პრეზიდენტმა შეიწყალა პირი, რომელიც ბათუმში პოლიციელის, თარაშ მუკბანიანის მკვლელობისთვის იყო მსჯავრდებული. პოლიციელის მკვლელობისთვის რამაზ დევაძეს 2015 წლის 18 სექტემბერს 12 წლით პატიმრობა მიუსაჯეს.

რამდენიმე კვირის წინ თვითონ სალომე ზურაბიშვილმა მაშინ გადაწყვეტილების განმარტებაზე უარი განაცხადა. მისი თქმით, შეწყალება პრეზიდენტის დისკრეციული უფლებაა.

"ეს უცებ გახდა რაღაც სალაპარაკო პრობლემა იმ დროს, როცა აქ ამდენი არის პოზიტივზე სალაპარაკო. ესეც დიდად არ მიკვირს. თუ რამე განცხადება არის უფრო დეტალური გასაკეთებელი, ეს უნდა გაკეთდეს თბილისში", — თქვა მაშინ ზურაბიშვილმა.

პრეზიდენტის გადაწყვეტილებას კრიტიკით შეხვდნენ როგორც ხელისუფლების, ისე ოპოზიციის წარმომადგენლები. ამასთანავე, მკვლელობისთვის მსჯავრდებულთა შეწყალება მიუღებელი აღმოჩნდა მმართველი პარტიის დეპუტატებისთვის. რამდენიმედღიანი კრიტიკის შემდეგ პრეზიდენტი გამოვიდა ინიციატივით, რომ შეწყალების უფლება დაიხვეწოს. 18 სექტემბერს მან შეწყალებაზე მორატორიუმი გამოაცხადა.