ბათუმის საქალაქო სასამართლომ პოლიციელზე თავდასხმაში ბრალდებულ ხუთივე პირს აღკვეთი ღონისძიების სახით 25-25 ათასი ლარის გირაო შეუფარდა.

ბრალდების მხარე ხუთივე პირისთვის პატიმრობას ითხოვდა, რადგან, მათი თქმით, მიმალვის და მტკიცებულებების განადგურების საფრთხე არსებობს. პროკურატურის წარმომადგენელი ამბობს, რომ გადაწყვეტილებას გაასაჩივრებენ.

შემთხვევა 16 სექტემბერს მოხდა. ბრალდებულები ამბობენ, რომ ერთ-ერთ საცხოვრებელ სახლში ქეიფობდნენ, მოგვიანებით ტაქსი გამოიძახეს, რომელსაც ეზოში ელოდებოდნენ. მათი თქმით, ეზოში ხმამაღლა საუბრობდნენ და იქვე მდგომ მანქანას მიეყრდნენ. მათივე განცხადებით, აღმოჩნდა, რომ ეს მანქანა შინაგან საქმეთა სამინისტროს მაღალჩინოსანს, როინ კოჩალიძეს ეკუთვნოდა, რომელიც ამ დროისთვის შვებულებაში იმყოფებოდა. ბრალდებულების თქმით, სამოქალაქო ფორმაში კოჩალიძე მათთან მივიდა, აგინა და იარაღი მიაბჯინა, რასაც ფიზიკური დაპირისპირება მოჰყვა.

პროკურატურის ვერსიით, პოლიციელი როინ კოჩალიძე მათთან მივიდა, თავი წარუდგინა და წესრიგისკენ მოუწოდა, თუმცა, ამის მიუხედავად, ხუთი პირი მას თავს დაესხა.

გამოძიება სისხლის სამართლის კოდექსის 353-ე მუხლით მიმდინარეობს, რაც პოლიციელზე თავდასხმას გულისხმობს. ბრალის დამტკიცების შემთხვევაში მათ ოთხიდან შვიდ წლამდე პატიმრობა ემუქრებათ. ისინი მომხდარიდან რამდენიმე დღეში დააკავეს.

დაკავებულები გაზეთ ბათუმელების მფლობელის და დირექტორის, მზია ამაღლობელის ოჯახის წევრები არიან. ამაღლობელი ამბობს, რომ თავდაპირველად გამოძიება სისხლის სამართლის კოდექსის 126-ე ძალადობის მუხლით დაიწყო, თუმცა, მოგვიანებით გადაკვალიფიცირდა პოლიციელზე თავდასხმის მუხლით. ამაღლობელი ამბობს, რომ დაკავებულებს ბრალი იმიტომ დაუმძიმდათ, რომ როინ კოჩალიძე გავლენიანი პირია და მას შინაგან საქმეთა მინისტრის მოადგილესთან, ვლადიმერ ბორცვაძესთან არის დაახლოებული.