შინაგან საქმეთა მინისტრის მოადგილემ, ბესიკ ამირანაშვილმა, ტელეკომპანია იმედს განუცხადა, რომ სამართალდამცავებმა 3 დღიანი ოპერაციის შედეგ გახსნეს დეპუტატ გივი თარგამაძის ავტომობილის აფეთქების ფაქტი. მისი თქმით, შსს–ს, სუს–ისა და პროკურატურის ერთობლივი ღონისძიებებით დადგინდა დანაშაულში მონაწილე სავარაუდო პირი და ამჟამად მიმდინარეობს დამატებითი საგამოძიებო მოქმედებები მტკიცებულებების მოპოვების მიზნით.

იმედის ცნობით, სამართალდამცავები ამ წუთებში ჩხრეკენ სოდ–ის ყოფილი თანამშრომლის, დავით ხეჩუაშვილის სახლს.

4 ოქტომბერს, თბილისში, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა ააფეთქეს. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. ჯანდაცვის მინისტრის ინფორმაციით, მანქანის აფეთქებისას დაშავებულთა რიცხვი ხუთია. მათგან ერთ-ერთს საავადმყოფოში ოპერაცია ჩაუტარდა.

შსს-მ გამოძიება დამამძიმებელ გარემოებაში, განზრახ მკვლელობის მცდელობის მუხლით დაიწყო.

გივი თარგამაძე დარწმუნებულია, რომ მისი ავტომობილი მართვადი ასაფეთქებლით ააფეთქეს და პასუხისმგებლობას ხელისუფლებას აკისრებს.