ბრაზილიაში, ამაზონის ტროპიკულ ტყეებში ხანძრების რეკორდული მაჩვენებელი დაფიქსირდა. კოსმოსური კვლევების ეროვნული ინსტიტუტის (Inpe) ინფორმაციით, წინა წლის ანალოგიურ პერიოდთან შედარებით ხანძრების რაოდენობა 84 პროცენტით გაიზარდა.

BBC-ის ინფორმაციით, მსოფლიოს უდიდესი ტროპიკული ტყე სასიცოცხლოდ მნიშვნელოვანი ნახშირბადის საცავია, რაც გლობალური დათბობის ტემპების შენელებას უწყობს ხელს. ამასთანავე, აქ სამ მილიონამდე სხვადასხვა სახეობის მცენარე და ცხოველი ბინადრობს. გარდა ამისა, იქ მილიონამდე მკვიდრი მოსახლეობა ცხოვრობს.

Inpe-ს მონაცემებით, მიმდინარე წლის იანვრიდან აგვისტოს ჩათვლით ტყეებში 74 ათასი ხანძარი დაფიქსირდა, როცა წინა წელს 40 ათასი ხანძარი იყო. სატელიტის ფოტოებიდან ჩანს, რომ ბრაზილიის ყველაზე ჩრდილო შტატი, რორაიმა მუქი კვამლით არის დაფარული. ასევე, ამაზონის შემოგარენში საგანგებო სიტუაციაა გამოცხადებული.

ფოტო: NASA

როგორც Inpe-ში ამბობენ, ამაზონის ტყეებში გაჩენილი ხანძარი არ შეესაბამება იმ მონაცემს, რომელიც, ზოგადად, მშრალი სეზონისთვისაა დამახასიათებელი. მათივე თქმით, ცეცხლის გაჩენა უფრო ადამიანების სპეციალური ან უნებლიე ნამოქმედარია. გარდა ამისა, ორგანიზაციაში აცხადებდნენ, რომ წინა წლის პერიოდთან შედარებით ივნისში ტყეების გაჩეხვა 80 პროცენტით გაიზარდა.

ბუნების მსოფლიო ფონდის წარმომადგენლის, რიკარდო მელოს თქმით, ხანძრები ტყეების გაჩეხვისა ბრალია, რომელიც ბოლო პერიოდში მომატებულია.

უფლებადამცველები ამაზონის ტყეების ხანძრებში ბრაზილიის ულტრამემარჯვენე პრეზიდენტ ჟაირ ბოლსონარუს ადანაშაულებენ, რადგან მისი ეკოლოგიური პოლიტიკის გამო ტყეების დანაკარგები გაიზარდა.

ფოტო: Reuters

რეკორდულ რიცხვებზე ჟაირ ბოლოსონარუმ განაცხადა, რომ ეს ე.წ. კეიმადას სეზონის შედეგია, როდესაც ფერმერები მიწის გასაწმენდად ცეცხლს იყენებენ. შემდგომში კი ტროპიკულ ტყეებში ხანძრის გაჩენა არასამთავრობო ორგანიზაციებს დააბრალა, რომლებიც "დაფინანსების შემცირების გამო სამაგიეროს უხდიან".

წინა თვეში ბოლოსონარუმ ტყუილში დაადანაშაულა Inpe-ს დირექტორი, რომელიც ამაზონის ტროპიკული ტყეების შემცირებაზე საუბრობდა. სკანდალის ფონზე დირექტორი დაკავებული პოზიციიდან გაათავისუფლეს.