პარლამენტის ვიცე სპიკერის, ზვიად ძიძიგურის განმარტებით, კონსტიტუციაში ქორწინების, როგორც ქალისა და მამაკაცის ერთობის, განმარტების დაზუსტება საჭიროა. ამის შესახებ მან ადამიანის უფლებათა დაცვისა და სამოქალაქო ინტეგრაციის კომიტეტის სხდომაზე დღეს, 5 მაისს, ისაუბრა.

კომიტეტმა საკანონმდებლო ინიციატივის წესით წარმოდგენილი საქართველოს კონსტიტუციური კანონის პროექტი-საქართველოს კონსტიტუციაში ცვლილების შეტანის თაობაზე განიხილა, რომელზეც მომსხენებელმა ზვიად ძიძიგურმა განმარტა, რომ კონსიტუციაში ქორწინების, როგორც ქალისა და მამაკაცის ერთობის, განმარტების დაზუსტება საჭიროა:

"საკონსტიტუციო სასამართლოში შესულია სარჩელი #714, რომელშიც ჩვენი ერთი მოქალაქე ასაჩივრებს სამოქალაქო კოდექსის 1106-ე მუხლს, სადაც წერია, რომ ქორწინება არის ქალისა და მამაკაცის ერთობა. სარჩელი, მარტივად რომ ვთქვათ, გამოიყურება ასე, რომ ვინადან კონსტიტუციაში არ არის დაზუსტებული მეუღლეები, როგორც ქალი და მამაკაცი, და ამას წერს სამოქალაქო კოდექსი, სამოქალაქო კოდექსის ნორმა ეწინააღმდეგება კონსტიტუციას. ასე რომ, განმარტება, რომ ეს ისედაც ასეა და რაში გვჭრდება დამატებით კონსტიტუციაში ამის ჩაწერა, თავიდანვე უნდა გამოირიცხოს. ეს ასე არ არის. სამართლებრივად, გამოჩნდა აგერ მეორე მოსაზრება".

ძიძიგურის თქმით, კონსტიტუციაში განსაზღვრება უნდა იყოს მკაფიო, რადგან ოჯახი როგორც ინსტიტუტი, არის უმნიშვნელოვანესი და მას დაცვა და გაფრთხილება საკონსტიტუციო დონეზე სჭირდება:

"მე ვფიქრობ, რომ როდესაც საქართველოში დემოგრაფიის თვალსაზრისით ძალიან მძიმე ვითარება გვაქვს და გაეროს მონაცემებით გადაშენების პირას ვართ მისული, ამიტომ ძალიან მნიშვნელოვანია სწორედ ის, რომ ასეთი ტიპის ჩანაწერი გაჩნდეს. მე მიმაჩნია, რომ ბავშვებს აქვთ უფლება მათი დედები იყვნენ ქალები და მათი მამები იყვნენ კაცები".

ზემოაღნიშნული კანონპროექტის თანახმად, კონსტიტუციის 36-ე მუხლის პირველ პუნქტში ქორწინების ცნება უნდა განისაზღვროს. ამჟამინდელი კონსტიტუციის მიხედვით, ქორწინება ემყარება მეუღლეთა უფლებრივ თანასწორობასა და ნებაყოფლობას. კანონპროექტის თანახმად კი, იგი შესაძლოა ჩამოყალიბდეს, როგორც ქორწინება, რომელიც არის ოჯახის შექმნის მიზნით ქალისა და მამაკაცის ნებაყოფლობითი კავშირი და ემყარება მეუღლეთა უფლებრივ თანასწორობას.

ცვლილებების ინიციატორი პარლამენტის 80 წევრია, დასამტკიცებლად კი 113 დეპუტატის ხმა იქნება საჭირო.