საქართველოს პრეზიდენტის, სალომე ზურაბიშვილის ინიციატივით შექმნილ საქველმოქმედო ფონდში ამ დროისთვის ფული მხოლოდ თავად ზურაბიშვილს აქვს გადარიცხული. ამის შესახებ ინფორმაცია ფონდიდან ინტერპრესნიუსმა გამოითხოვა.

სააგენტოს ცნობით, ფონდში 35 ათას ლარზე მეტია ჩარიცხული. მათივე ინფორმაციით, ფონდში ზურაბიშვილის ხელფასის გარდა სხვა ფიზიკური ან იურიდიული პირის მიერ თანხების ჩარიცხვა არ ფიქსირდება. სააგენტოს გამოთხოვილი ინფორმაციით თანახმად, ფონდს რაიმე პროექტი ან აქტივობა არ დაუფინანსებია.

2019 წლის იანვარში ზურაბიშვილი პრეზიდენტის სარეზერვო ფონდის გაუქმების შემდეგ ახალი ფონდის შექმნის ინიციატივით გამოვიდა. მაშინ პრეზიდენტმა აღნიშნა, რომ ფონდში საკუთარ ხელფასს ყოველთვიურად გადარიცხავდა.