ტელეკომპანია რუსთავი 2-ის ყოფილმა დირექტორმა, ნიკა გვარამიამ იმ პროკურორების არიდება მოითხოვა, რომლებიც მისთვის აღკვეთის ღონისძიების განსახილველ სხდომაზე ბრალდების მხარეს წარმოადგენენ. გვარამიამ პროკურორებს მატყუარები უწოდა.

"მუნჯი რომ ბრალდება შეურაცმყოფელი სიტყვა ჰგონია, ეს სხვაგან წაგვიყვანს. ადამიანის უფლებათა კურსი მაინც უნდა ჰქონდეთ გავლილი, სანაამ პროცესს წაიყვან. მათი ამ პროცესში მონაწილეობა არის მეძიებლობა, როცა მოიპოვებ ინფორმაციას და ამ ინფორმაციით ცდილობ შექმნას დანაშაული. ეს ადამიანები არ ემსახურებიან დადგენილ ვალდებულებებს დაადგინონ საქმესთან დაკავშირებით რეალური გარემოებები და რეალური კვალიფიკაცია მისცენ ფაქტებს. ამ ადამიანების აცილების საფუძველი მარტივია", — განმარტა გვარამიამ.

მოსამართლემ მისი არგუმენტი არ გაითვალისწინა და უპასუხა:

"სახელმწიფო ბრალდება არის თავის პოზციაზე, მას ეკისრება ბრალდების მტკიცების პასუხისმგებლობა, ის პასუხობს თქვენს ყველა კითხვას; მან თქვა, რომ მას არ მოუსმენია, რა განცხადება გააკეთეთ და არ აქვს ამის ვალდებულება, თუმცა მე მომისმენია", — განაცხადა მოსამართლე გიორგი კერატიშვილმა.

გუშინ, 9 აგვისტოს პროკურატურამ ნიკა გვარამიას ბრალი წაუყენა. მას არხის დირექტორად მუშაობის დროს საზიანო გადაწყვეტილების მიღებას ედავებიან.

გვარამიას წინააღმდეგ 16 ივლისს რუსთავი 2-ის 9-პროცენტიანი წილის ყოფილმა მფლობელმა, ნინო ნიჟარაძემ პროკურატურაში საჩივარი შეიტანა. ნიჟარაძე ტელეკომპანიის დირექტორის მიერ უფლებამოსილების ბოროტად გამოყენების მუხლით გამოძიების დაწყებას ითხოვდა. ისვე აცხადებდა, რომ გვარამიას გადაწყვეტილებებმა არხს ფინანსური ზიანი მიაყენა. სწორედ ამ საქმეზე აპირებს პროკურატურა ტელევიზიის ყოფილი დირექტორისთვის ბრალის წაყენებას.