რუსთავი 2-ის ინფორმაციით, ახალმა მფლობელმა, ქიბარ ხალვაშმა არხის ჟურნალისტებს საზოგადოებრივი საბჭოს შექმნაზე უარს უთხრა. კურიერისა და პოსტსკრიპტუმის გუნდი გენერალურ დირექტორს, პაატა სალიას შეხვდა.

რუსთავი 2-ის ცნობით, პაატა სალია ამბობს, რომ კონსულტაციები გაიარა ქიბარ ხალვაშთან, რომელიც უარს ამბობს, შეიქმნას საზოგადოებრივი საბჭო. მათივე ინფორმაციით, ხალვაში, ასევე, უარს ამბობს, გაფორმდეს რაიმე სახის დოკუმენტი, სადაც არხის ახალი მფლობელი აიღებს ვალდებულებას სარედაქციო დამოუკიდებლობაზე.

"წერილობითი გარანტია არ არსებობს და არ არსებობს, მით უმეტეს, იმ ფორმით, რა ფორმითაც იყო შემოთავაზებული. ეს ვერ იქნება გარანტია იქიდან გამომდინარე, რომ იგივე სიტყვები, რაც იმ პუნქტში წერია, რომ შეიძლება მაღალრეიტინგული გადაცემის რეიტინგის შემცირება გამოიწვიოს და ა.შ. რეიტინგის შემცირება შეიძლება ბევრ ფაქტორზე იყოს დამოკიდებული და მერე ამას შეიძლება ათასი ინტერპრეტაცია მიეცეს", — ამბობს სალია.

მისივე თქმით, ეს არ არის და ვერ იქნება ის ფორმა, რომელიც ნდობის მოსაპოვებლად უნდა იყოს რუსთავი 2-ის გუნდსა და ახალ მფლობელს შორის.

"ნდობის მოპოვება ერთ დღეში არ ხდება, გავაგრძელებთ მუშაობას და მე ისიც ვუთხარი, რომ თუ რაიმე სიმპტომი იქნება, რომ ვიღაც ცდილობს ჩარევას და ა.შ. ამის შესახებ ჩვენ აუცილებლად უნდა ვისაუბროთ", — აღნიშნავს სალია.

რუსთავის 2-ის საინფორმაციო-პოლიტიკური დეპარტამენტის თანამშრომლებმა არხის ახალ მფლობელს და დირექტორს ერთობლივი განცხადებით მიმართეს. სარედაქციო დამოუკიდებლობის უზრუნველსაყოფად მათ გეგმა წარადგინეს, რომელიც საზოგადოებრივი საბჭოს შექმნას და საკადრო ცვლილებებზე მორატორიუმის გამოცხადებას ითვალისწინებს.