გადაცემაში, შეხვედრები რეგიონულ მედიასთან, GDS-ის ჟურნალისტის მიხეილ ფეიქრიშვილის კითხვაზე, თუ ჰყავს ფავორიტი მინისტრები მინისტრთა კაბინეტში, ბიძინა ივანიშვილმა უპასუხა, რომ არამხოლოდ ფავორიტი, ბევრი საყვარელი მინისტრი ჰყავს:

"ნახეთ როგორ მუშაობს თუნდაც ქუმსიშვილი, თუნდაც სერგეენკო, თუგინდ კალაძე, დამრჩება ბევრი ჩამოუთვლელი და ნაწყენი დარჩებიან, თეა წულუკიანი, რამდენიც გინდათ იმდენია, რომლებიც იცავენ პირველ რიგში სტანდარტებს, შემდგომ, მინისტრებს შორის გრადაცია შეიძლება გააკეთო მენეჯმენტითა და პროფესიონალიზმით, მაგრამ სტანდარტებს ყველა იცავს, მათ შორის სოზარ სუბარი. ახალი მინისტრებიც ეფექტიანები არიან".

ბიძინა ივანიშვილმა ასევე დასძინა, რომ დღეს ხელისუფლების წევრები მისი პრემიერობის შემდეგ დატოვებულ სტანდარტებს იცავენ.

შეხვედრები რეგიონულ მედიასთან - ასე ჰქვია ტელეკომპანია GDS-ის ახალ საარჩევნო პროექტს, რომელშიც ყოფილი პრემიერმინისტრი, ბიძინა ივანიშვილი მონაწილეობს. გადაცემას 20:30-ის ჟურნალისტები ნათია თოიძე და მიხეილ ფეიქრიშვილი უძღვებიან.