დღეს, იუსტიციის სამინისტროში, მაიკროსოფტსა და იუსტიციის სამინისტროს მონაცემთა გაცვლის სააგენტოს შორის ხელშეკრულება გაფორმდა. ინფორმაციას სააგენტოს პრესსამსახური ავრცელებს. როგორც უწყების ხელმძღვანელი ირაკლი გვენეტაძე აცხადებს, მაიკროსოფტი აღნიშნული სააგენტოს რესურსს გამოიყენებს:

„დღეს საფუძველი ჩავუყარეთ თანამშრომლობის უპრეცედენტო მოდელს, როდესაც ისეთი კორპორაცია, როგორიც მაიკროსოფტია, თანხმდება, გამოიყენოს ადგილობრივი ორგანიზაციის, რესურსი და კომპეტენცია საკუთარი გლობალური პროექტების განხორციელების პროცესში".

გვენეტაძე ყურადღებას ამახვილებს ისეთი საიტების გამართულ მუშაობასა და ერთი ფანჯრის პრინციპით ინფორმაციის მიწოდების შესაძლებლობაზე, როგორიცაა მოქალაქის პორტალი (my.gov.ge), ერთიანი სავაჭრო ქსელი (TFS) და მონაცემთა გაცვლის ინფრასტრუქტურის მოდელი. მისი თქმით შესაძლოა საქართველოში შექმნილი ელექტრონული მმართველობის ტექნოლოგიური გადაწყვეტები მსოფლიო ბაზარზე გავიდეს.

მაიკროსოფტის კორპორაციული სერვისების დირექტორი ცენტრალურ და აღმოსავლეთ ევროპაში ლორან დანიკანი აცხადებს, რომ კორპორაცია მხარს უჭერს საქართველოს განვითარებას და მასთან ამ მიმართულებით თანამშრომლობას მომავალშიც აპირებს:

„მონაცემთა გაცვლის სააგენტოს ექსპერტული ცოდნა და გამოცდილება მნიშვნელოვან როლს ითამაშებს მაიკროსოფტის სერვისებთან დაკავშირებული სხვადასხვა გლობალური პროექტის წარმატების საქმეში".

როგორც სააგენტოს პრესსამსახური იტყობინება, მაიკროსოფტის პროექტებში ჩართვას მონაცემთა გაცვლის სააგენტო მიმდინარე წლიდან გეგმავს.