დღეს, 11 აპრილს პატრიარქი ილია მეორე ქართული ოცნების ლიდერს, ბიძინა ივანიშვილს შეხვდა. ერთ-ერთ გავრცელებულ ფოტოში რუსეთის ეკლესიის მეთაურის, ალექსი პირველის პორტრეტი ჩანს. მართლმადიდებელი ეკლესიის საპატრიარქო განმარტებას ავრცელებს, თუ რატომ არის ჩამოკიდებული საპატრიარქოს რეზიდენციაში რუსი პატრიარქის პორტრეტი.

როგორც საპატრიარქოს განცხადებაშია განმარტებული, რეზიდენციის ერთ-ერთ შესასვლელ ოთახში კედელზე კიდია ორი პირველიერარქის ფერწერული პორტრეტი, რადგან მათ სახელს უკავშირდება საქართველოს ეკლესიის ავტოკეფალიის აღდგენის ცნობა:

  • რუსეთის პატრიარქი ალექსი პირველი, რომელიც 1943 წელს საქართველოს ეკლესიის ავტოკეფალიის აღიარების შემდეგ პირველად ოფიციალურად ჩამოვიდა საქართველოში და მცხეთაში პატრიარქ კალისტრატესთან ერთად ერთობლივი წირვა აღასრულა;
  • მსოფლიო პატრიარქი დიმიტრიოსი, რომელმაც 1990 წელს საპატრიარქო სიგელებით დაადასტურა საქართველოს ეკლესიის ავტოკეფალიის ცნობა უძველესი დროიდან.

"სამწუხაროდ, ბოლო დროს ეკლესიის მიმართ უსაფუძვლო, ცილისმწამებლური და შეურაცხმყოფელი ქმედებები არის გახშირებული და ცალკეული პიროვნებების დღევანდელი კომენტარებიც ამის კიდევ ერთი დადასტურებაა", — ნათქვამია საპატრიარქოს განცხადებაში.

ფოტო: საქართველოს საპატრიარქო

შესწორება: საპატრიარქოს მიერ გავრცელებულ განცხადებაში თავდაპრველად ეწერა, რომ რუსეთის ეკლესიის მეთაურმა ალექსი პირველმა 1943 წელს საქართველოს ეკლესიის დამოუკიდებლობა აღიარა. თუმცა, ტაბულას ინფორმაციით, ალექსი პირველი პატრიარქი 1945 წელს გახდა. საპატრიარქომ შემდგომში განცხადება ჩაასწორა.