ქართული ოცნების მმართველობიდან მე-7 წელს პარლამენტში მთავარი განსახილველი საკითხი კანონპროექტებზე ხმის სწორად მიცემაა. ზოგ დეპუტატს ღილაკები ერევა, ზოგს კანონპროექტები, ზოგი წითელსა და მწვანეს ვერ არჩევს. არადა, საქართველოს პარლამენტის რეგლამენტში დეტალურადაა გაწერილი კანონპროექტისთვის ხმის მიცემის პროცედურა...

ხმის მიცემის წესი

საქართველოს პარლამენტის რეგლამენტით, კენჭისყრის დაწყება ნახევარი საათით ადრე ცხადდება. ხმის მიცემის წინ ტარდება პარლამენტის წევრთა რეგისტრაცია.

თუ პარლამენტის პლენარულ სხდომას არ ესწრება კენჭისყრისათვის საჭირო პარლამენტის წევრთა რაოდენობა, სხდომის თავმჯდომარე გადადებული კენჭისყრის გამართვის დროს ასახელებს.

კენჭისყრის პროცედურის ჩატარებისას 1-წუთიანი გამოსვლა დასაშვებია მხოლოდ კენჭისყრის პროცედურულ საკითხებზე. ამასთანავე, უმცირესობას, უმრავლესობას უფლება აქვს, პროცედურულ საკითხზე 1-წუთიანი გამოსვლით ისარგებლოს ოთხჯერ; ფრაქციას, რომელიც არ არის გაერთიანებული უმრავლესობაში ან უმცირესობაში, — ორჯერ; დამოუკიდებელ პარლამენტის წევრს — ერთხელ.

ფრაქციების მოთხოვნით, კენჭისყრის პროცედურის დაწყების წინ შეიძლება გამოცხადდეს შესვენება მხოლოდ ერთხელ, 5 წუთით.

კენჭისყრის პროცედურის ჩატარებისას პარლამენტის წევრის მიერ სხდომათა დარბაზის დატოვება დაუშვებელია.

პარლამენტის წევრი ხმას პირადად აძლევს. ხმის მიცემის უფლებისა და ხმის მისაცემი ბარათის სხვისთვის გადაცემა დაუშვებელია.

თუ პარლამენტის წევრმა კენჭისყრაში მონაწილეობა არ მიიღო, მას უფლება არა აქვს, ამ საკითხზე ხმა კენჭისყრის შედეგების გამოცხადების შემდეგ მისცეს.

კენჭისყრის ფორმა

პარლამენტის პლენარულ სხდომაზე კენჭისყრა შეიძლება იყოს ღია:

  • ხელის აწევა;
  • კენჭისყრის ელექტრონული სისტემით გვარების ამობეჭდვა;
  • სახელობითი ბიულეტენებით – სახელობითი კენჭისყრა რეგლამენტით გათვალისწინებულ შემთხვევებში.

ან ფარული — კენჭისყრის ელექტრონული სისტემის გამოყენებით ან ბიულეტენებით კენჭისყრა რეგლამენტით გათვალისწინებულ შემთხვევებში.

კენჭისყრა ყოველთვის ღიაა, გარდა საქართველოს კონსტიტუციითა და სხვა საკანონმდებლო აქტით გათვალისწინებული შემთხვევებისა.

ფარული კენჭისყრის წინ პარლამენტის პლენარული სხდომის თავმჯდომარე აცხადებს კენჭისყრის ფორმას.

დაუშვებელია პარლამენტის მიერ მიღებული კანონის ან დადგენილების გადაკეთება ან გასწორება საბოლოო კენჭისყრის შემდეგ. ამ ქმედების განხორციელება იწვევს კანონით გათვალისწინებულ პასუხისმგებლობას.

დეპუტატ ლევან კობიაშვილის ცნობით, ასე გამოიყურება "ეშმაკისეული მაცდური პოპულარული პულტი". თითქოს ყველაფერი ძალიან მარტივია. მწვანე ნიშნავს — მომხრეს, წითელი — წინააღმდეგს.

ამავე თემაზე: