24 მარტს, 20:00 საათზე პირველ არხზე საბავშვო მუსიკალური კონკურს რანინას მეორე სეზონი იწყება.

პროექტში სულ ათი კონკურსანტი იღებს მონაწილეობას, რომელთაც ერთი ტურიდან მეორეში გადასასვლელად ურთულესი ბარიერების გადალახვა მოუწევთ.

პირველ ტურში მონაწილეები ბროდვეის პოპულარული მიუზიკლების საუნდტრეკებს ქართული ესტრადის ვარსკვლავებთან ერთად შეასრულებენ.

პროექტის წამყვანები პიანისტი დავით ალადაშვილი და მსახიობი ლელა მებურიშვილი არიან.

კონკურსი მოიცავს ოთხ თემატურ ტურს, თითოეული ტური კი ორ ორ ტელეეპიზოდად იყოფა. ძირითად ტურებს გადის ყველა მონაწილე, ხუთი მათგანი გადადის ნახევარფინალებში. ფინალში გამარჯვებისთვის იბრძვის სამი კონკურსანტი. თითოეულ მუსიკალურ ტურს მონაწილეები გადიან ორკესტრთან, მუსიკალურ ჯგუფებთან, ბენდებთან, ან ცნობილ მომღერლებთან ერთად.

თითოეულ ტურში კონკურსანტებს აფასებს ჟიური, რომელიც სამი წევრისგან შედგება, თუმცა მათი შემადგენლობა ყოველი ტურის დროს იცვლება.

პირველ კონცერტზე ჟიურის სავარძლებს დავით ევგენიძე, ბექა გოჩიაშვილი და სალომე კორკოტაშვილი დაიკავებენ.

ნახევარფინალის საერთო რეიტინგის მიხედვით გამოვლინდება სამი ფინალისტი. ფინალისტებს შორის გამარჯვებულს კი ჟიური აირჩევს.