ნატოს გენერალური მდივანი იენს სტოლტენბერგი უკვე თბილისში იმყოფება. ორიდღიანი ვიზიტის ფარგლებში, იგი 7 სექტემბერს, ჩრდილოატლანტიკური საბჭოს, ანუ ნატოს წევრი ქვეყნების ელჩებისაგან დაკომპლექტებული გუნდის ვიზიტის ფარგლებში, ნატო-საქართველოს კომისიის სხდომა გაიმართება. კომისიის მუშაობაში საქართველოს პრემიერ მინისტრი გიორგი კვირიკაშვილი მიიღებს მონაწილეობას. სხდომაზე განიხილავენ ვარშავის სამიტის შედეგებს,

ჩრდილოატლანტიკური საბჭოს ვიზიტი საქართველოში მეოთხედ იმართება. 7 სექტემბრის მთავრობის სხდომაზე, გიორგი კვირიკაშვილმა განაცხადა, რომ გენერალური მდივნის ვიზიტი არის ჩრდილოატლანტიკური ალიანსის მხრიდან მნიშვნელოვანი გზავნილი საქართველოს მხარდაჭერისა და თანამშრომლობის განვითარების კუთხით:

"ვიზიტის ფარგლებში გაიმართება ნატო-საქართველოს კომისიის სხდომა, სადაც განხილული იქნება ძირითადი პაკეტის იმპლემენტაციის საკითხები, რაც უდაოდ ძალიან მნიშვნელოვანია ჩვენი ქვეყნის თავდაცვისუნარიანობის განმტკიცებისა და ევროატლანტიკურ ოჯახში საქართველოს ინტეგრაციისთვის".

საბჭოს ვიზიტი შეაფასა ასევე აშშ-ს ელჩმა იან კელიმ. მისი თქმით, როდესაც შესაბამისი პოლიტიკური გარემო შეიქმნება, საქართველოს აქვს ყველა ინსტრუმენტი რომ ალიანსს შეუერთდეს:

"ვფიქრობ ძალიან მნიშვნელოვანია იმის დემონსტრირება რომ ნატო ინარჩუნებს ღია კარის პოლიტიკას, რომ საქართველოს აქვს ყველა ინსტრუმენტი ალიანსში გასაწევრიანებლად, როცა პოლიტიკური ატმოსფერო იქნება შესაბამისი. ამ ორგანიზაციის მთავარი პირები იმყოფებიან აქ, რომ საქართველოს ნატოში გაწევრიანების გზაზე მხარდაჭერა გამოუცხადონ".

ვიზიტის ფარგლებში დაგეგმილია შეხვედრები პრეზიდენტთან გიორგი მარგველაშვილთან, საქართველოს პარლამენტის თავმჯდომარე დავით უსუფაშვილთან და პარლამენტის წევრებთან, საქართველოს თავდაცვის მინისტრთან ლევან იზორიასთან, საგარეო საქმეთა მინისტრთან მიხეილ ჯანელიძესთან, ასევე, საერთაშორისო და არასამთავრობო ორგანიზაციებისა და მედიის წარმომადგენლებთან.

ვიზიტის ფარგლებში ნატო-ს გენერალური მდივანი სიტყვით გამოვა საქართველოს პარლამენტის ეროვნულ ბიბლიოთეკაში და სტუდენტების კითხვებს უპასუხებს.