წლევანდელი ოსკარის ნომინანტებს თუ გადავხედავთ, თამამად შეიძლება ითქვას, რომ საუკეთესო მსახიობების კატეგორიაში დიდი კონკურენციაა, განსაკუთრებით კი ქალებში. აქ ერთმანეთის პირისპირ გლენ ქლოუზი, ოლივია კოლმანი, მელისა მაკარტი, ლედი გაგა და იალიცა აპარისიო დაუპირისპირდებიან. ამ ხუთი კანდიდატიდან, თითოეული მათგანი საკუთარი პერფორმანსისთვის ნამდვილად იმსახურებს ჯილდოს, თუმცა მხოლოდ ერთი გახდება 24 თებერვლის ღამეს დოლბის თეატრის სცენაზე ასვლის ღირსი. დიდი ალბათობით, ეს ან ოლივია კოლმანი იქნება ან გლენ ქლოუზი, თუმცა ნაადრევად ამ პროგნოზის გაკეთება რთულია.

არანაკლებ დიდი კონკურენციაა საუკეთესო მსახიობი კაცისა და მეორეხარისხოვანი როლის შემსრულებელი მსახიობების კატეგორიებშიც. გამარჯვებულების ვინაობას ჩვენ მხოლოდ ერთი თვის შემდეგ გავიგებთ, თუმცა ამჯერად შეგვიძლია ვნახოთ, თუ რა რეაქცია ჰქონდათ თავად ნომინანტებს, როდესაც გაიგეს, რომ ნომინაცია მიიღეს.

ბრედლი კუპერი

"პირველ რიგში დიდი მადლობა მინდა გადავუხადო იმ ადამიანებს, რომლებმაც ამ ფილმის შექმნაში მიიღეს მონაწილეობა. მათ გარისკეს ყველაფერი, ბევრი გავრისკე მეც, რადგან ვიცოდი, რომ მეორე შანსი აღარ მექნებოდა. მიხარია, რომ აკადემიამ ეს რისკები და ეს ფილმი დააფასა და ღირსეულ ნომინანტთა გვერდით მეც ვარ"

უილიამ დეფო

"ვან გოგის როლის შესრულება ჩემთვის უდიდესი პატივი იყო და მიხარია, რომ კინოაკადემიამ ამ როლით ასეთი ღირსეული ადამიანების გვერდით მიმიჩინა ადგილი. დიდი მადლობა ყველას"

რიჩარდ გრანტი

"ლონდონის ერთ-ერთ რესტორანში ვიყავი ჩემს შვილთან ერთად. ტელეფონში ვუყურებდით ნომინაციების გამოცხადებას და როდესაც ჩემი სახელი თქვეს ვერ ვიჯერებდი, არც ახლა მჯერა რომ ნომინაციაზე წარმადგინეს. უდიდესი პატივია ეს ჩემთვის"

მაჰერშალა ალი

"მიხარია, რომ აკადემიამ ისეთი ღირსეული კანდიდატების გვერდით დამასახელა, როგორებიც ამ ნომინაციაში წარდგენილი მსახიობები არიან. ვაფასებ ფილმს, რომელშიც ვთამაშობ და მიხარია, რომ ის შეუმჩნეველი არ დარჩა"

სემ ელიოტი

"ნომინაციის გაგებისას პირველი რაც გონებაში მომივიდა იყო ის, რომ ვიფიქრე - ჯანდაბა, ამის დროც მოვიდა! 50-წლიანი კარიერის შემდეგ, როგორც იქნა ოსკარის ნომინაცია მივიღე. მართლა ძალიან მიხარია და გამიმართლა"

ემი ადამსი

"დიდი მადლობა კინოაკადემიას. მიხარია, რომ ნომინანტთა შორის აღმოვჩნდი ფილმით, რომელში მონაწილეობაც ჩემთვის დიდი პატივი იყო და მასზე მუშაობა მიყვარდა. ვულოცავ ყველა სხვა ნომინანტსაც"

ემა სტოუნი

"The Favourite-ზე მუშაობა ჩემი საყვარელი მეგობრების, ოლივია კოლმანისა და რეიჩელ ვაისის გვერდით, უდიდესი პატივი იყო. ძალიან მიხარია, რომ ფილმმა ამდენი ნომინაცია მიიღო და მადლობა აკადემიას, რომ ჩვენი მუშაობა შეუმჩნეველი არ დარჩა"

რეჯინა კინგი

"ძალიან ამაყი ვარ, რომ ისეთ დიდებულ ადამიანებთან მომიწია მუშაობა, როგორიც ამ ფილმს ჰყავდა. ბედნიერი ვარ, რომ აკადემიამ ნომინაცია მომცა და გულწრფელად ვულოცავ ყველა კატეგორიის ნომინანტს, თითოეული მათგანი დამსახურებულად წარადგინეს ოსკარზე"

რეიჩელ ვაისი

"დიდი მადლობა ამერიკის კინოაკადემიას, რომ ფილმი ამდენ ნომინაციაში წარადგინა. ძალიან ბედნიერი ვარ და ვთვლი, რომ გამიმართლა. ისეთი ნიჭიერი ქალების გვერდით ყოფნა, როგორებიც ამ კატეგორიაში არიან, ნამდვილად დიდი დაფასებაა"