ე.წ. ყვითელჟილეტიანებმა პარიზის ქუჩებში აქციები განაახლეს. ამის შესახებ The Reuters წერს. გამოცემის ცნობით, პარიზის პოლიციამ მომიტინგეების დასაშლელად გამოიყენა წყლის ჭავლი და ცრემლსადენი გაზი.

ათასობით აქტივისტმა პარიზში ხმაურიანი მარში გამართეს, თუმცა ძირითადად მშვიდობიანად გამოხატეს პროტესტი იმ საცხობთან ახლოს, სადაც დღეს ძლიერი აფეთქება მოხდა. აფეთქებას 4 ადამიანის სიცოცხლე ემსხვერპლა მათ შორის ორი მეხანძრე და ერთი ესპანელი ტურისტია.

თუმცა დემონტრანტების მცირე ჯგუფმა დაარღვია განსაზღვრული მარშრუტი და ბოთლები და სხვა ნივთები ესროლა პოლიციას. აქციის მონაწილეები ცრემლსადენი გაზითა და წყლის ჭავლით ტრიუმფალური თაღის მიმდებარე ტერიტორიაზე დაარბიეს.

აქციის მონაწილეები მაინც შეიკრიბნენ და საფრანგეთის პრეზიდენტს, ემანუელ მაკრონს გადადგომისკენ მოუწოდეს.

პარიზში გამართული აქციის ფარგლებში 5000-მდე პოლიციელს მაღალი ბარიკადები აქვს აღმართული, მათთან ერთად ჯავშანტექნიკაც მობილიზებულია.

პარიზში საპროტესტო აქციის გამო განსაკუთრებით გაძლიერებულია უსაფრთხოების ზომები, მათ შორის შანზ-ელიზეზე, სადაც ბანკები და საიუველირო მაღაზიები მდებარეობს.

11 დეკემბერს საფრანგეთის პრეზიდენტი, ემანუელ მაკრონი დათმობაზე წავიდა და მოსახლეობას ქვეყანაში მინიმალური ხელფასის გაზრდასა და გადასახადების შემცირებას დაპირდა. მაკრონმა აღნიშნული განცხადება ქვეყანაში რამდენებიმეკვირიანი აქციისა და არეულობის შემდეგ გააკეთა. 2019 წლიდან მინიმალური ხელფასი 100 ევროთი გაიზრდება.

მან, ასევე, განაცხადა, რომ დაგეგმილი ცვლილება, დაბალშემოსვალიანი პენსიონერებისთვის გადასახადის გაზრდა და ზეგანაკვეთურის დაბეგვრა, აღარ იქნება. ხოლო დამქირავებლები სტიმულირებული იქნებიან იმისკენ, რომ წლის ბოლოს თანამშრომლებს პრემია გადაუხადონ, რომელიც ასევე არ დაიბეგრება. თუმცა მაკრონმა უარი თქვა გადასახადი გაეზარდა მდიდრებისთვის და აღნიშნა, რომ ეს ეკონომიკას შეასუსტებს მაშინ, როცა სამუშაო ადგილებია შესაქმნელი.

2019 წელს კი საწვავზე ფასი კიდევ ერთხელ უნდა გაზრდილიყო, რამაც გააბრაზა ე.წ. ყვითელჟილეტიანები — ასეთი ჟილეტი საფრანგეთის ნებისმიერმა მძღოლმა მანქანაში უნდა იქონიოს.

საპროტესტო აქციებში ათი ათასობით ადამიანი იღებდა მონაწილეობას. დემონსტრანტები არბევდნენ პარიზის ქუჩებს, მაღაზიებსა და კულტურულ ძეგლებს, ცეცხლს უკიდებდნენ მანქანებსა და საბურავებს. ვანდალური დარბევის მსხვერპლი გახდა ტრიუმფალური თაღიც. პოლიცია დემონსტრანტების დასაშლელად იყენებდა ცრემლსადენ გაზსა და წყლის ჭავლს.

თავდაპირველად საფრანგეთის ხელისუფლება ამბობდა, რომ საწვავზე ფასის ზრდა აუცილებელი იყო, რადგან ეს ხელს შეუწყობდა ეკოლოგიურ მდგომარეობას და ფრანგები კერძო მანქანებიდან საზოგადოებრივ ტრანსპორტზე გადავიდოდნენ. თუმცა 6 დეკემბერს ხელისუფლებას დათმობაზე წასვლა მაინც მოუწია და თავის გეგმაზე უარი თქვა.