ყოფილმა პრეზიდენტმა მიხეილ სააკაშვილმა საქართველოში დაბრუნებაზე თქვა, რომ არ სურს ექსცესები, რაც მისი აზრით, ქართველ ხალხს მიუბრუნდება. ამის შესახებ მან ტვ პირველის ეთერში, ნინო ჟიჟილაშვილთან ინტერვიუსას თქვა.

"რა თქმა უნდა, მე მენატრება და ერთგული ვარ ჩემი ქვეყნის, საქართველოსი და მენატრება ყოველი კვადრატული მეტრი საქართველოსი, ყოველი უჯრედიც მენატრება, სიმართლე გითხრათ. მათ ეშინიათ ჩემი და მე არ მეშინია მათი. მე მეშინია ექსცესების. მე მეშინია ჩვენი ხალხი არ დაზარალდეს, რომ თავისთავად ამას არ მოყვეს ის, რაც შემდეგ შეუბრუნდება საქართველოს და არა მხოლოდ ივანიშვილს", — ამბობს სააკაშვილი.

2 დეკემბერს, თბილისში, რუსთაველის გამზირზე გამართულ ნაციონალური მოძრაობის აქციაზე მიხეილ სააკაშვილმა იქ დამსწრე მხარდამჭერებს უთხრა, რომ როგორც კი მისი ისინი დაუძახებენ, "იმ წამს გაჩნდება მათ გვერდით".

ყოფილი პრეზიდენტი ამჟამად ჰოლანდიაში ცხოვრობს. მასზე საქართველოში ოთხი სხვადასხვა მუხლით არის აღძრული სისხლის სამართლის საქმე.