საქართველოს მეხუთე პრეზიდენტი, სალომე ზურაბიშვილი პარლამენტში მივიდა. ჟურნალისტების კითხვაზე, ვისთან შესახვედრად იმყოფებოდა ის საკანონმდებლო ორგანოში, უპასუხა — "ჩემს თავთან"

პრეზიდენტი ქართული ოცნების დეპუტატების, ზვიად კვაჭანტირაძისა და ეკა ბესელიას კაბინეტებში იმყოფებოდა. სალომე ზურაბიშვილმა პარლამენტი კითხვებზე პასუხის გაცემის გარეშე დატოვა. ჟურნალისტებს დაცვამ მასთან მიახლოების საშუალება არ მისცა, რის გამოც დაცვის წევრებსა და ჟურნალისტებს შორის შეხლა-შემოხლაც კი მოხდა.

მოგვიანებით, სალომე ზურაბიშვილის პარლამენტში ვიზიტის შესახებ კომენტარი იურიდიულ საკითხთა კომიტეტის თავმჯდომარემ, ეკა ბესელიამ გააკეთა. მისი თქმით, შეხვედრა მეგობრული იყო.

"სხვადასხვა საკითხზე ვისაუბრეთ, მათ შორის შემდგომი თანამშრომლობის ფორმებზე. პარლამენტისა და პრეზიდენტის მუშაობის პროცესი ეს არის მუდმივად ერთმანეთთან დაკავშირებული პროცესი", — განაცხადა ბესელიამ.

ზურაბიშვილის საპარლამენტო მდივნის, დავით გაბუნიას განცხადებით, საქართველოს პარლამენტთან სალომე ზურაბიშვილი თანამშრომლობის ფორმატზე უნდა შეთანხმდეს. ამ მიზნით კი დეპუტატებსა და პრეზიდენტს შორის კონსულტაციებია დაგეგმილი.