ქართული ოცნების გენერალურმა მდივანმა და თბილისის მერმა კახა კალაძემ ინგა გრიგოლიასთან გადაცემა რეაქციაში თქვა, რომ "ერთ მშვენიერ დღეს შეიძლება ოპოზიციაში აღმოჩნდეს". წამყვანის დამაზუსტებელ შეკითხვაზე, იგულისხმა თუ არა მან, ქართული ოცნების ოპოზიციში ყოფნა, კალაძემ უარყო და თქვა, რომ მან გუნდთან ერთად ოპოზიციაში გადასვლა იგულისხმა.

ინგა გრიგოლიას თავდაპირველი შეკითხვა კახა კალაძის ოპოზიციის მიმართ ნათქვამს, "ვისაც გადატრიალება უნდა, საწოლში გადატრიალდეს", ეხებოდა, თუ რა რეაქცია ექნებოდა, მას ოპოზიციის ადგილზე რომ ყოფილიყო.

"მომიწევს გახსენება წლების, როდესაც მე ოპოზიციაში ვიყავი და არც იმას გამოვრიცხავ, რომ ერთ მშვენიერ დღეს აღმოვჩნდე ოპოზიციაში. ვარ პოლიტიკური გუნდის წევრი, ვარ პოლიტიკოსი და ეს ჩვეულებრივი პოლიტიკური ცხოვრების ნაწილია, აქ სიახლეს და რაღაც განსხვავებულს ვერაფერს ვერ ვიტყვი", — თქვა კახა კალაძემ და მოგვიანებით დააზუსტა, რომ გულისხმობს პარტიასთან ერთად ოპოზიციაში ყოფნას, ვინაიდან "ქართული ოცნება ყოველთვის ხელისუფლებაში ვერ იქნება".

გუშინ, 17 დეკემბერს, პარტია ქართული ოცნების გენერალური მდივანი, კახა კალაძე გაერთიანებული ოპოზიციის მიერ უწყვეტი აქციების დანონსებას ამ სიტყვებით გამოეხმაურა:

"იმ სახელმწიფოს დედა ვატირე გრიგოლა ვაშაძე გადატრიალებას რომ მოაწყობს, გადატრიალდნენ საკუთარ სახლებში".

გუშინვე გაერთიანებულმა ოპოზიციამ "უწყვეტი" აქციები დააანონსა. გრიგოლ ვაშაძის განცხადებით, საქართველოს ხელისუფლებამ მოპარული არჩევნების შემდეგ მოქალაქეების კონსტიტუციური უფლებები შეზღუდა.

16 დეკემბერს ინაუგურაციის პარალელურად ხმაური იყო თბილისი-კახეთის გზაზე. ერთმანეთს გაერთიანებული ოპოზიციის წევრები და პოლიცია დაუპირისპირდა. სოფელ ველისციხეში მდგომარეობა მას შემდეგ დაიძაბა, რაც გაერთიანებულ ოპოზიციას გზა გადაუკეტა პოლიციამ და თელავში ჩასასვლელად ყვარლის შემოვლითი გზით წასვლა ურჩია. ამ გზაზე ოპოზიციას ავტობუსები ელოდებოდნენ, რომლებიც აქციის მონაწილეებს თელავის მერიის მიერ პროტესტისთვის განსაზღვრულ ადგილზე გადაიყვანდნენ.

გაერთიანებული ოპოზიციის პოზიციით, შსს-მ შეზღუდა კონსტიტუციური უფლება, გამოხატვის თავისუფლება.