"ჩემი პირადი მოსაზრებით, კანონში ცვლილების გარეშეც შესაძლებელია რეორგანიზაციის განხორციელება", — ასე გამოეხმაურა საქართველოს პარლამენტის თავმჯდომარე, ირაკლი კობახიძე საჯარო სამსახურის კანონში შესატან ცვლილებების პროექტს, რომელიც პრეზიდენტის ადმინისტრაციის თანამშრომლებს შეეხება.

ირაკლი კობახიძის თქმით, პრეზიდენტის ადმინისტრაციის საკითხზე მმართველ გუნდში მსჯელობა გაიმართა. მისივე განმარტებით, შტატების რაოდენობა ბიუჯეტის კანონის თანახმად იცვლება.

"იყო გაბერილი შტატები, რასაც თავიდანვე ვამბობდით და რაც ნათლად ჩანდა პრეზიდენტის ადმინისტრაციაში. ბიუჯეტის კანონის თანახმად, 140 შტატის ნაცვლად პრეზიდენტის ადმინისტრაციაში 60 შტატი იქნება. პრეზიდენტის ადმინისტრაცია ჩამოყალიბდება პრეზიდენტის უფლებამოსილებების შესაბამისად. ამას სჭირდება, რა თქმა უნდა, რეორგანიზაცია", — განაცხადა კობახიძემ.

ირაკლი კობახიძის შეფასებით, საკითხთან დაკავშირებით, არაჯანსაღი აჟიოტაჟი ატყდა, რაც არასწორია. მან კიდევ ერთხელ განმარტა, რომ ბიუჯეტის კანონის თანახმად, რეორგანიზაცია გარდაუვალია.

"ჩვენ მივესალმებით, ზოგადად, კრიტიკას, იმიტომ, რომ კრიტიკის საფუძველზე ყალიბდება საბოლოო ჯამში, სწორი აზრი, თუმცა, არ არის სწორი არაჯანსაღი აჟიოტაჟის ატეხვა ისეთ საკითხებთან დაკავშირებით, რომლის განხილვაც აჟიოტაჟის გარეშე შეიძლება", — ამბობს პარლამენტის თავმჯდომარე.

კობახიძის განმარტებით, რეორგანიზაციის შემდეგ პრეზიდენტის ადმინისტრაციაში დასაქმებულ ზოგიერთ პირს პროფესიული მოხელის სტატუსი ექნება, ზოგიერთი კი ხელშეკრულებით დასაქმდება.

"ეს არის პრეზიდენტის განსასაზღვრი. ამის მიხედვით ჩამოყალიბდება რეორგანიზაციის გეგმა და განხორციელდება რეორგანიზაცია. პირადად ჩემი აზრია, რომ მომავალ პრეზიდენტს არ შეეშლება ხელი რეორგანიზაციაში, თუ ის იმოქმედებს დღეს მოქმედი კანონის შესაბამისად. აქედან გამომდინარე, მე პირადად, მგონია, რომ არ არის საჭირო ამ კანონის მიღება", — აცხადებს კობახიძე.

მისივე თქმით, მმართველი გუნდი საბოლოო გადაწყვეტილებას მოგვიანებით გააჟღერებს.

პარლამენტში დარეგისტრირდა ცვლილების პროექტი საჯარო მოხელის შესახებ კანონში, რაც საქართველოს ახალ პრეზიდენტს, სალომე ზურაბიშვილს საშუალებას მისცემს გაათავისუფლოს ადმინისტრაციის თანამშრომლები და ახალი კადრები კონკურსის გარეშე დანიშნოს. ქართული ოცნების დეპუტატების, რატი იონათამაშვილისა და გურამ მაჭავარიანის საკანონმდებლო ინიციატივით, პრეზიდენტის ადმინისტრაციის თანამშრომლები ჩაითვლებიან ადმინისტრაციული ხელშეკრულებით დასაქმებულ პირებად და მათზე პროფესიული საჯარო მოხელეების შრომითი გარანტიები აღარ გავრცელდება.

გაიგე მეტი: