შინაგან საქმეთა სამინისტროს განცხადებით, ონში გრიგოლ ვაშაძის საარჩევნო შტაბის უფროსი, ნოდარ ბურდილაძე პოლიტიკური მოტივით არ დაუჭრიათ. იმის მიუხედავად, რომ ოპოზიცია საქმეში პოლიტიკური დანაშაულის ნიშნებს ხედავს, შსს აცხადებს, რომ კონფლიქტი ყოფით ნიადაგზე წარმოიშვა და ცალკეული პირების მიერ მედიასაშუალებებით გავრცელებული ინფორმაცია არაა სიმართლე.

გამოძიების ვერსიით, საქმეში ბრალდებული 22 ნოემბერს ღამის საათებში მეგობართან გასაღების გამოსართმევად მივიდა და ქუჩიდან ხმამაღლა ეძახდა. ხმაურზე მეზობლად მცხოვრებმა ნოდარ ბურდილაძემ გამოიხედა და შენიშვნა მისცა ბრალდებულს, რაზეც არაფხიზელ მდგომარეობაში მყოფი პირი გაღიზიანდა. შსს-ს ინფორმაციით, მათ შორის დაწყებული შელაპარაკება ფიზიკურ დაპირისპირებაში გადაიზარდა და ბურდილაძეს ბრალდებულმა დანით ჭრილობა მიაყენა.

მოგვიანებით, საქმეზე მკვლელობის მცდელობის ბრალდებით ერთი პირი დააკავეს. იმის გამო, რომ ინციდენტის თვითმხილველი დაცვის პოლიციის თანამშრომელია, საქმე გამოსაძიებლად პროკურატურას გადაეცა, ხოლო პოლიციელს გამოძიების დასრულებამდე სამსახურებრივი უფლებამოსილება შეუჩერდა.

ენმ-ის წევრის, პეტრე ცისკარიშვილის თქმით, ბურდილაძის ჯანმრთელობის მდგომარეობა საკმაოდ მძიმეა, თუმცა სამედიცინო პერსონალი მათ ინფორმაციას არ აწვდის . ცისკარიშვილი ამასაც პოლიტიკურ პროცესებს უკავშირებს და ამბობს, რომ ჯანდაცვის სისტემაც პოლიტიზებულია.

"არანაირი ავტოკატასტროფით გამოწვეული ჭრილობები ეს არაა. მოხდა კონფლიქტი პოლიტიკურ ნიადაგზე", — განაცხადა ცისკარიშვილმა.

ერთიანი ნაციონალური მოძრაობის პოლიტიკური საბჭოს თავმჯდომარე, ნიკა მელი კი ამბობს, რომ გამოძიების ვერსია არაა ზუსტი და გაერთიანებული შტაბის თავმჯდომარეს თავს ორი პირი დაესხა.