გურჯაანში, სოფელ ვეჯინში ნაციონალური მოძრაობის კოორდინატორის, ელმირა ბეციაშვილის თქმით, მის ეზოში ე.წ. მოლოტოვის კოქტეილი შეაგდეს. შემთხვევა დღეს საღამოს, 22 ნოემბერს მოხდა. ინციდენტის შედეგად არავინ დაშავებულა. ბეციაშვილი ჰყვება, რომ პირველად ქმარმა შენიშნა ცეცხლი ეზოში მდგარ სტუმრის მანქანასთან. იგი აცხადებს, რომ ებრძვიან, როგორც პოლიტიკურად აქტიურ ადამიანს.

"გადმოგდებულია სამი მინის ბოთლი, რომელშიც არის მუქი, მაზუთისფერი სითხე. თავები აქვს დამტვრეული და დაღვრილია სითხე", — ამბობს ბეციაშვილი.

შინაგან საქმეთა სამინისტროში On.ge-ს განუცხადეს, რომ საქმეზე უკვე დაიწყო გამოძიება სისხლის სამართლის კოდექსის 187-ე მუხლით, რაც სხვისი ნივთის ან ქონების დაზიანებას გულისხმობს.