საქართველოს პარლამენტში პეტიცია დარეგისტრირდა, რომლის ხელმომწერებიც მოითხოვენ, საქართველოს მოქალაქეები ქვეყნის "რეალური მესაკუთრეები" გახდნენ. პეტიციას ხელს საინიციატივო ჯგუფის, "გახდი მესაკუთრის" სახელით 767 პირი აწერს.

პეტიციის ავტორებს ორი მოთხოვნა აქვთ:

  • საქართველოს ყოველ მოქალაქეზე ყოველთვიურად გაიცეს 1 000 ერთეული სპეციალური საინვესტიციო ფული — ინვესტი;
  • სახელმწიფოს მხრიდან გასაყიდად გამოტანილი ყველა ქონების ყიდვა შესაძლებელი იყოს მხოლოდ ინვესტებზე, ღია, საყოველთაო ელექტრონულ აუქციონზე ლოტების ან აქციების სახით.

იდეის ავტორებს მიაჩნიათ, რომ აღნიშნული ინიციატივით გამოსწორდება მოქალაქეების მატერიალური და ფინანსური მდგომარეობა, შეწყდება "ერთეულების გამდიდრება სახელმწიფო ქონების პრივატიზების ხარჯზე".

"ბოლშევიკების მიერ ნაციონალიზებული და მოქმედი მთავრობების ხელში დღემდე უფასოდ შენარჩუნებული გიგანტური ქონების და შესაბამისი ძალაუფლების, ასევე, უფასოდ დაბრუნება უშუალოდ მოქალაქეთა ხელში, შეძლებისდაგვარად, თანაბარი გადანაწილებით უნდა ხდებოდეს", — ნათქვამია პეტიციის ტექსტში.