პარტია ქართული ოცნების ინფორმაციით, ნაციონალური მოძრაობის წარმომადგენლებს დაგეგმილი აქვთ ბოლნისის 23-ე საარჩევნო ოლქში N27-ე, N54-ე, N40-ე და N43-ე უბნების ჩაშლა.

პარტიის ცნობით, ეს არის უმძიმესი სამართალდარღვევა, კანონდარღვევა.

"ვაფრთხილებთ ძალიან მკაცრად ნაციონალური მოძრაობის წარმომადგენლებს, რომ ისინი კანონის ფარგლებში მიიღებენ უმკაცრეს პასუხს ასეთ კანონდარღვევაზე", — ნათქვამია ქართული ოცნების მიერ გავრცელებულ განცხადებაში.

ამავე განცხადებაში ვკითხულობთ, რომ ნაციონალური მოძრაობის აქტივისტები აპირებენ უბნის ჩაშლას, დაგეგმილი აქვთ მძიმე პროვოკაცია.

"ვაფრთხილებთ ყველას, რომ ამასთან დაკავშირებით არის განსაზღვრული უმკაცრესი სანქცია, კანონმდებლობით და ისინი პასუხს აგებენ კანონის თანახმად უმკაცრესი ფორმით", — ნათქვამია განცხადებაში.

ქართული ოცნება დილიდან საუბრობს, რომ ნაციონალური მოძრაობა საარჩევნო უბნებზე არეულობასა და გაყალბებას გეგმავს. მოსალოდნელ პროვოკაციებზე მამუკა მდინარაძემაც ისაუბრა ქართული ოცნების ოფისში გამართულ ბრიფინგებზე. პარალელურად, ოპოზიცია ქართული ოცნების მხრიდან აგიტაციასა და გაყალბების მცდელობებზე ბრიფინგებს მართავს.

ბოლო სიახლეები: საპრეზიდენტო არჩევნები 2018