შინაგან საქმეთა სამინისტროს პრესსამსახურის ინფორმაციით, პოლიციელებმა დააკავეს პირი, რომელმაც ამბროლაურში ავტოგასამართი სადგური და მაღაზია დააყაჩაღა. უწყებაში აღნიშნავენ, რომ ბრალდებული ცხელ კვალზე დააკავეს.

"გამოძიებამ დაადგინა, რომ ბრალდებულმა ამბროლაურში ცეცხლსასროლი იარაღის მუქარით ავტოგასამართი სადგური და მაღაზია დააყაჩაღა, რის შემდეგაც შემთხვევის ადგილიდან მიიმალა", — აღნიშნულია შსს-ს მიერ გავრცელებულ განცხადებაში.

საქმეზე გამოძიება სისხლის სამართლის კოდექსის 179-ე მუხლის პირველი ნაწილით მიმდინარეობს. ამ მუხლით ყაჩაღობა ჩადენილი სიცოცხლისათვის ან ჯანმრთელობისათვის საშიში ძალადობით ანდა ასეთი ძალადობის გამოყენების მუქარით ისჯება თავისუფლების აღკვეთით ხუთიდან შვიდ წლამდე ვადით.