ოზურგეთში ურთიერთშელაპარაკების ნიადაგზე 16 და 20 წლის ბიჭები დაიჭრნენ. ამის შესახებ ინფორმაცია On.ge-ს შინაგან საქმეთა სამინისტროში დაუდასტურეს.

უწყების ცნობით, დაკავებულია ერთი პირი და გამოძიება 117-ე მუხლით მიმდინარეობს, რაც ჯანმრთელობის განზრახ მძიმე დაზიანებას გულისხმობს.

შსს-ს მიერ გავრცელებულ განცხადებაში ნათქვამია, რომ ბრალდებულმა, მიმდინარე წლის 15 სექტემბერს, ოზურგეთში, ურთიერთშელაპარაკების ნიადაგზე, 2001 წელს დაბადებულ პირს ცივი იარაღით ჭრილობა მიაყენა და შემთხვევის ადგილიდან მიიმალა. დაზარალებული ოზურგეთის საავადმყოფოში არის გადაყვანილი და მის სიცოცხლეს საფრთხე არ ემუქრება.

სამართალდამცველებმა ბრალდებული მომხდარიდან რამდენიმე წუთში დააკავეს.

შსს-ს ცნობით, გამოძიებამ ასევე დაადგინა, რომ ურთიერთშელაპარაკებისას, საკუთარი ცივი იარაღით დაზიანებები ბრალდებულმაც მიიღო. ბრალდებულს სამედიცინო დახმარება მედიკოსებმა უკვე აღმოუჩინეს.

ინტერპრესნიუსის ინფორმაციით, დაჭრილები სასწრაფო სამედიცინო დახმარების მანქანამ ზურგეთში კლინიკა "მედალფაში" გადაიყვანა. მათ ჭრილობები გულ-მკერდისა და ბარძაყის არეშიმ აქვთ მიყენებული და ამ დროისთის ოპერაცია უტარდებათ.

On.ge ამ დრომდე ცდილობს კლინიკასთან დაკავშირებას.