საქართველოს პრეზიდენტის საპარლამენტო მდივანმა ანა დოლიძემ, პრეზიდენტისა და ქორწინების შესახებ რეფერენდუმთან დაკავშირებით საინიციატივო ჯგუფის წარმომადგენლებთან დღევანდელი შეხვედრის თაობაზე განაცხადა, რომ დათქმული კონსულტაცია აღარ შედგება:

"საზოგადოებისთვის ცნობილია, რომ საქართველოს პრეზიდენტი მზად იყო შეხვედროდა რეფერენდუმის საინიციატივო ჯგუფს, თუმცა დღეს რეფერენდუმის საინიციატივო ჯგუფის წარმომადგენელმა აირჩია კონფრონტაციის და შანტაჟის ენა და უარი განაცხადა ამ კონსულტაციაზე, რაც ნათლად ავლენს ამ ჯგუფის ვიწრო პოლიტიკურ მიზნებს. აქედან გამომდინარე ეს დათქმული შეხვედრა აღარ შედგება".

საინიციატივო ჯგუფის მიერ ცენტრალურ საარჩევნო კომისიას შემდეგი შინაარსის სარეფერენდუმო შეკითხვა წარედგინა: "თანახმა ხართ თუ არა, რომ სამოქალაქო ქორწინება განისაზღვროს როგორც ოჯახის შექმნის მიზნით კავშირი მამაკაცსა და ქალს შორის".

ცენტრალურმა საარჩევნო კომისიამ სამოქალაქო ქორწინების განსაზღვრის შესახებ საინიციატივო ჯგუფის მოთხოვნა, თავის დასკვნასთან ერთად, რეფერენდუმის დასანიშნად პრეზიდენტს გადაუგზავნა.

საინიციატივო ჯგუფისა და გიორგი მარგველაშვილის საკონსულტაციო შეხვედრა 9 აგვისტოს 17:00 საათისთვის იყო ჩანიშნული.