სასტუმრო ველმონდი, იგივე ყოფილი ლეოგრანდი, დღეს, 17 აგვისტოს დაიხურება. მიზეზი უსაფრთხოების ნორმებში გამოვლენილი ხარვეზებია. როგორც აჭარის ტურიზმის დეპარტამენტის პრესსამსახურმა On.ge-ს განუმარტა, ამ დროისთვის ველმონდიდან სტუმრები გამოჰყავთ და სხვა სასტუმროებში ანაწილებენ.

საგანგებო სიტუაციების მართვის სამსახურმა სასტუმროს საქმიანობის შესაჩერებლად ვადა 17 აგვისტოს 18 საათამდე მისცა. როგორც ტურიზმის დეპარტამენტში აღნიშნეს, სასტუმრო სტუმრებისგან ბოლომდე სწორედ ამ დრომდე დაიცლება და დაიხურება. დეპარტამენტის ინფორმაციითვე, სასტუმრო ფუნქციონირებას მას შემდეგ გააგრძელებს, რაც საგანგებოს მიერ უსაფრთხოებასთან დაკავშირებით გაცემული რეკომენდაციები შესრულდება.

აჭარის მთავრობის თავმჯდომარის, თორნიკე რიჟვაძის თქმით, უსაფრთხოების ნორმები უმთავრესია და აჭარის მთავრობა საგანგებო სიტუაციების მართვის სამსახურთან მოლაპარაკებებში იყო ჩართული, რის შედეგადაც კონკრეტულ შეთანხმებას მიაღწიეს.

"დასაქმებული პირები შეინარჩუნებენ სამუშაო ადგილს და ხელფასს. რაც შეეხება იმ ხარვეზებს და ნაკლოვანებებს, რომლებიც უსაფრთხოების კუთხით ჰქონდა კომპანიას, უახლოეს მომავალში გამოსწორდება და შემდეგ უკვე ჩვენ დავსხდებით და დავილაპარაკებთ, თუ როგორ შეიძლება გაგრძელდეს აღნიშნული ბიზნესოპერატორის საქმიანობა", - განაცხადა რიჟვაძემ ჟურნალისტებთან საუბრისას.

2017 წლის 24 ნოემბრის ღამეს, სასტუმრო ლეოგრანდში გაჩენილი ხანძრის შედეგად, 11 ადამიანი დაიღუპა. მათ შორის, 10 საქართველოს, ხოლო ერთი ირანის მოქალაქე. ტრაგედიის შემდეგ სასტუმრო ლეოგრანდმა ფუნქციონირება ველმონდის სახელწოდებით გააგრძელა.

საგანგებო სიტუაციების მართვის სამსახურმა 2018 წლის 10 ივლისს განაცხადა, რომ სასტუმრო უსაფრთხოების ნორმებს კვლავ ვერ აკმაყოფილებდა და სასამართლოს მიმართა. მათი თქმით, შენობაში კვამლსაწინააღმდეგო დაცვის სისტემები არაა დამონტაჟებული, რაც ევაკუაციას აფერხებს და სწორედ ეს იყო გასულ წელს ადამიანთა დაღუპვის ძირითადი მიზეზი. საგანგებომ სტუმრების გასაყვანად სასტუმროს 17 აგვისტომდე მისცა ვადა, ხოლო თუ ისინი ამ ვალდებულებას არ შეასრულებდნენ, სასამართლოს გადაწყვეტილება მაინც აღსრულდებოდა და დაწესებულება დაიხურებოდა.

ამის შემდეგ სასტუმროს ადვოკატმა, კახაბერ წერეთელმა განაცხადა, რომ სასტუმროს დახურვა აგვისტოში, როცა ტურისტული სეზონის პიკია, გამოუსწორებელ შედეგებს მოუტანს სასტუმროს. გუშინ, 16 აგვისტოს საგანგებომ განაცხადა, რომ დაიწყო ოთხმხრივი მოლაპარაკება საგანგებო სიტუაციების მართვის სამსახურს, სასტუმროს ადმინისტრაციას, აჭარის მთავრობასა და აჭარის ტურიზმის დეპარტამენტს შორის.